Shillong, K’Lyngkot 30
Hadien ka jingmih ki kynrum kynram halor ka jingker sainar ha khappud bad ka Ri Bangladesh ha kaba la kynnoh ba ka kompeni kaba shim ïa katei ka kam ka leh buit-tuh, kata da kaba ker khlem ïaid katkum ki dak ba la buh nalor ka jingthom da ka bor ïa ki jaka rep kwai ha ki bynta ka Ri War Jaiñtia, ha ka 29 tarik u Kyllalyngkot, 2026, u Dr. Ricky AJ Syngkon, MP Lok Sabha na Shillong Parliamentary Constituency u la hiar ban jurip dalade ïa kitei ki shnong bad ki jaka khappud bad katei ka Ri ba marjan, kata naduh Jaliakhola, Sankhat shaduh Kamsing, Pasadwar kiba hap ha Amlarem Civil Sub-Division, West Jaiñtia Hills District.
Kane ka jingleit jngoh u Dr. Ricky Syngkon ka dei hadien ba la mih ruh ka jingpyrshah da ki trai jaka ïa ka jingthmu shna surok jubor da katei ka kompeni kaba la tip kum ka NBCC kaba shna jingker pud khlem ka jingtip bad jingmynjur da ki trai jaka baroh.
U Dr. Ricky u la lum ruh ïa ka jingïalang bad ki bor pynïaid District West Jaiñtia Hills ba la wan mihkhmat na ka ophis SDO Amlarem Civil Sub-Division ryngkat ki heh shipai BSF, ki heh pulit, u MDC ka War Central, u Bah Jamshaphrang Pohtam kumjuh ki trai jaka bad ki rangbah nongïalam jong ka kynhun ki phra shnong katei ka thaiñ.
Ha kane ka jingïalang u la ïoh ban sngap ïa ki jingkren da ki nongïalam shnong bad ki trai jaka bad kumjuh na ka liang ka ophis SDO Amlarem Civil Sub-Division. Hadien kane, u MP u la ban jur ba dei ban don ka jingïakren pynbeit mardor ïa kane ka kam hapdeng ki bor pynïaid District, u Dolloi ka Elaka Satpator bad ki trai jaka, khnang ban wanrah biang ka jingïasngewthuh jingmut ban pynbeit noh ïa kine ki kynrum kynram baroh.
Ki trai jaka ki la pynpaw ba kim pyrshah ïa ka kam shna jingker khappud hynrei ki dawa ba ka Sorkar kan ithuh ïa ka hok longtrai bad nongkynti jong ki halor ki jaka puta kiba ki la long trai da ki spah snem bad pynpaw ruh ka jingbynñiaw ïa ka jingbym ai jingkyrshan u Doloi ka Elaka Satpator.
Ki trai jaka ki la dawa ba u Doloi u dei ban weng noh shi syndon ïa jingthoh ba u la ai sha ka ophis Deputy Commissioner halor ka jingkam jong u ïa ka jaka bad ba ka Sorkar ruh ka dei ban phah sangeh mardor ïa ka jingshna surok tad haduh ba la dep pynbeit ïa ki jingeh baroh.
Hadien ka jingïalang u MP ryngkat ki ophisar bad Majistor nalor ki MDC, ki pulit, ki heh shipai BSF, ki la leit jngoh da kaba shong lieng shaduh ki mawpud bad lap dalade ïa ka jingleh buit-tuh ka kompeni ban shna ïa ka jingker palat na ka jingthew ba la buh da ka Sorkar bad kane ka jingleh jong ka kompeni ka la buh jingma ïa shibun bha ka jaka puta ki ban shah pynhap noh sha Bangladesh.
La ong ba ka kompeni kam shym ïaid katkum ka jingthew ba la ruid dak halor ka nongrim ba kan wanrah ka jingduhnong lada ka hap shna haduh 2 lane 3 tylli ki jingkieng hynrei u MP u la pynpaw ka jingpyrshah ïa kane ka jingthmu ka kompeni ban ïaid lait ïa ki kyndon ba la buh bad dawa ba lada long kumno-kumno ruh dei ban ker beit lada dei naduh u Zero Point lane na ka 150 jam ruh. U la pynpaw ruh ba da kaba shna ïa ki jingkieng kan plie lad pynban ïa ka jingkiew jong ka kam ha kane ka jaka ba itynnad bha ka ban long ka jingmyntoi ïa ka thaiñ bad ki nongshong shnong kiba kamai lyngba ki kam jngohkai.
