Thiruvananthapuram:
Ki dkhot jong ka Kerala Green Army , ki nongtrei Autorickshaw, taksi, bad ki nongtrei Lottery, ryngkat bad ki khynnah skul, kin sa ïoh shen ïa ka jingïada na ki jingjia aksiden bad jingïada na ka jingim hapoh ki jingthmu bathymmai ba la pynbna ha ka mang tyngka jong ka Kerala 2026-27.
U Myntri ka tnat pla tyngka u K N Balagopal u la ong ba ki skhim, ban pyntreikam lang bad ka tnad Insurance jong ka jylla bad ba la kyrshan da ki jingïarap jong ka sorkar, kin kynthup ruh ïa ki nongtrei ha ka kam bym don jingpynbeit, kaba ai ka jingïada kaba kham heh na ka bynta kito kiba ju shah kyntait na ki jingïada ba pura jong ka Insurance.
U la ong ba la pynbeit ïa ki jingdonkam, kynthup ïa ka jingmang pisa kaba T.15 klur, na ka bynta ban ai jingïada ïa ka jingim ne ka jingjia aksiden ïa ki samla pule kiba pule naduh ka klas 1 haduh ka klas 12th standard.
” La khmih lynti da T. 15 klur na ka bynta kane ka skhim ha ka shisnem bad kajuh ka pisa la buh kyrpang na ka bynta kane,” la ong u Myntri.
U Myntri u la ong shuh shuh ba ka rukom pynthymmai jong ka Medisep ka skhim ai jingsumar na ka bynta kumba 11 lak ngut ki nongtrei sorkar bad ki nongïoh penshon ha Kerala kaba ai ïa ka jingshakri ai jingsumar khlem da don pisa khlem kano kano ka rta bad ka jingkhang ban peit bniah ïa ki nongpang kan treikam naduh ka 1 tarik u Rymphang shaneng.
Ka Medisep 2.0 kan don kham bun ki song tyngka bad ki hospital, u la ong.
Nalor kata, yn thaw ïa ka skhim Insurance ha ka rukom jong ka Medisep na ka bynta ki nongtrei bad ki nongïoh penshon jong ki kompeni sorkar bad ki jaka treilang ha ka jylla, la ong u Myntri.
U la ong ruh ba yn pyntreikam ïa ka skhim ai jingsumar ha ka dor kaba rem bha na ka bynta ki nongtrei Autorickshaw bad ki taksi, kiba dei ki dkhot jong ka Welfare Board.
U Myntri u la ong shuh shuh ba ka sorkar ka dang pyrkhat ruh ban pyntreikam ïa ka skhim ai jingsumar ba thymmai na ka bynta ki longïing kiba don shabar jong ka skhim Karunya Arogya Suraksha, kaba ai jingsumar ei ïa ki 42 lak tylli ki longïing jong ka jylla.
“Ïa kane ka skhim Insurance, kaba lah ban ïasoh da kaba siew ïa ka pisa kaba rit bha, yn pyntreikam ha u snem mang tyngka hi. Da T.50 klur la buh ha ka mang tyngka na ka bynta kane ka skhim,” u la ong.
Kumjuh ruh, la mang T.10 klur na ka bynta ka skhim Insurance kynhun na ka bynta baroh ki nongtong dohkha ha ka jylla, la bynrap shuh shuh u Myntri.
