Chennai, K’lyngkot:
Ka sorkar Dravidian model kan thaw ïa ki lad ki lynti kiba donkam ban pynthikna ba baroh ki kynthei kiba la nang la stad kin im laitluid, kin ïoh ïa ka tulop kaba donburom, kin long ki nongseng kam seng jam bad kin im khlem jingtieng, ong u Myntri Rangbah ka Jylla Tamil Nadu u MK Stalin hadien ba la plie ïa ka prokram ai kam ai jam bad jingïada ïa ki kynthei ha Tamil Nadu (TNWeSafe) ba la bei tyngka da ka World Bank.
Ha ryngkat ka prokram, la sdang ruh ïa ka jingïalang jong ki kynthei kaba ar sngi, ha kaba la ïashim bynta da ki nongmihkhmat kynthei na ki bynta bapher bapher jong ka ri.
Ka TNWeSafe ka thmu ban plie lad ïa ka jingkiew jong ki kynthei bad ban kyntiew ïa ka jinglong jingman jong ki lyngba ka rukom treikam kaba bniah kaba pynthikna ïa ki lad kamai, kaba pynlah ïa ki jingshakri bad ka jingithuh.
Ka World Bank kan ai T.1,250 klur na ka bynta kane ka prokram ha ka por san snem, ha kaba ïa ka bhah ba nyngkong kaba T.147 klur la ai sha ka jylla ha ka sngi Ba-ar.
Kum shi bynta jong kane ka prokram, ka sorkar kan pyntreikam ïa ki khyndai tylli ki skhim – ka Womenomics, ka Women Information Bank, ka Synergy, ka Thirancudar (ka jingpynroi ïa ki sap ki phong), ka Kalangarai (ka jingkyrshan ha ka kam), ka Thozhil Vidhai (ka jingseng kam), ka Thozhilanangu (ka jingpynroi) bad ka Anbu Kudil (ka Care Cube). Katkum ka jingong ki heh sorkar, kine ki skhim kin kyrshan bad pynkhlaiñ ïa kiwei pat ki jingthmu kiba la dep pyntreikam da ka sorkar na ka bynta ka jingkiew jong ki kynthei.
Haba kren ha kane ka jingïalang, u Stalin u la ong ba ka skhim TNWeSafe kam dei tang ban kyntiew ïa ki lad ïoh kam ïoh jam jong ki kynthei ha ki kam kiba dang kiew.
Haba pynksan ïa ka jingdonkam jong ki rukom kyrshan, u la ong ba dei ban pynthikna ïa ka jingsumar ïa ki khynnah bad ka jingsumar ïa ki kynthei lada ki kynthei ki dei ban ïashim bynta ha ka kam bad u la kdew ba ka skhim ka pynbeit ïa kane lyngba ki lad jingïarap kum ki ïing bad ki hostel.
“Ka International Monetary Fund (IMF) ka la ong ba ka jingpynduna ïa ka jingïapher ha ka ïoh ka kot hapdeng ki kynthei bad ki shynrang kan ïalam sha ka roi ka par kaba sted. Ngi ngeit ba ka jingïashim bynta jong ki kynthei ka long kaba kongsan bha na ka bynta ban pynthikna ba ka Tamil Nadu kan ïoh ïa ka ïoh ka kot kaba shi Trillion Dollar ha u snem 2030”, u la ong.
Ha katei ka sngi, ka Chairman bad Managing Director jong ka Tractors and Farm Equipment Limited (TAFE) ka Mallika Srinivasan ka la ban jur ïa ka jingdonkam jong ka jingkylla ha ka imlang sahlang ha kaba ka jingïaryngkat ka kylla long ka nongrim, ha kaba ka jingkyrshan jong ka sorkar ka pynlong ia ka jingkylla.
U Myntri Rangbah u la pyllait ruh ïa ka Cancer Care Mission na ka bynta ka tnad ka koit ka khiah. U la plie shuh shuh ïa ka skhim ban ai ïa ka dawai HPV ban ïada na ka jingpang Cancer ha ka kpoh ha ki khynnah kynthei haduh 14 snem ka rta.
Ki la don palat 3 lak ngut ki khynnah ha ka rta 14 snem kin ïoh jingmyntoi na kane ka skhim ïa kaba ka sorkar ka la mang T.36 klur ha ka mang tyngka.
Ha ka bynta kaba nyngkong, ka sorkar kan ai dawai ïa ki 30,209 ngut ki khynnah kiba pule ha ki skul sorkar bad kiba ïarap da ka sorkar ha ki saw tylli ki distrik kiba kynthup ïa ka Dharmapuri, Perambalur, Tiruvannamalai bad Ariyalur.
Ha kane ka sngi la ïashim bynta da u Symbud Myntri Rangbah u Udhayanidhi Stalin bad ki heh ophisar jong ka sorkar.
