Shillong, Rymphang 01
Ka Seng Kur Kpoh Hynniewta ha ka 31 tarik u kyllalyngkot ka la pynkup burom ïa ki khun samla ka kur kiba pyndep ha ki kyrdan pule bapher-bapher kynthup ïa ki nongïalehkaiha ki kyrdan bapher-bapher kiba long nonghikai bad ki longkmie kiba la palat 70 snem ka rta.
Ha kane ka jingialang kyllum ka Kur kaba la long ha Shillong la wan ban ïashimbynta u President ka seng kur u Bah J Hynniewta, u Vice Prsident u Bah Pynsuklang Hynniewta lem ki nongkitkam ha ryngkat ki longkmie bad ki kun samla ka kur.
U Bah J Hynniewta haba ai jingkren ha katei ka sngi u la ai ki kyntien kyntu kynpham ïa ki para kur bad ba kin long kiba treishitom ha kano-kano ka kam ba ki trei ne ki shakri ha ka imlang ka sahlang. nalor kata u la kyntu ruh ïa ki kmie ki kpa ban peitbha ïa ki khun ki kti jong ki, ban ai ki jinghikai kiba ïadei dur bad ka imlang ka sahlang, kumjuh ba ki khun jong ki ruh ba kin ïoh ïa ki jingnang jingstad bad ki ha ki kam ïalehkai.
U la kitbok kitrwiang ban bha ka ka kam ka jam jong ki para kur bad ba kin don ha ka met kaba koit ba khiah.
