Jowai, Rymphang 01
Ka Khimusniang SC ka la rah ïa ka nam lahduh ha ka lympung ïalehkai 17th U Kiang Nangbah Memorial Trophy-Super Division Football Tournament 2025 ba la pynïaid da ka West Jaiñtia District Sports Association (WJDSA).
Kane ka la wan hadien ba ka la pynliem noh ïa ka Ladthadlaboh SC lyngba ka tie-breaker da 4-2 kol ha ka jingïakhun phainal ha U Kiang Nangbah Stadium, Jowai ha ka sngi Saitjaiñ.
Ïa kane ka jingïakhun phainal la lah biang ban pynlong hadien ba ka bor pynïaid district jong ka West Jaiñtia Hills ka la pynmih ïa ka hukum ban weng noh shipor ïa ka jingsospon pyrshah ïa ki rang-ïalehkai ka Demthring hadien ba ki la mih ki kynrum kynram ha ka jingïakhun semi final pyrshah ïa ka Khimusniang kaba la long ha ka 5 tarik u Nohprah 2025. Te kumta ka Demthring SC ban buh da ka jingujor sha ka bor pynïaid district pyrshah ïa ka WJDSA na ka daw ka jingshah sospon ki rangïalehkai jong ka.
Haba phai sha katei ka jingïalehkai phainal hapdeng ka Khimusniang bad ka Ladthadlaboh ka la long kaba ïakhaid ha kaba ki la pyrshah ban ïakhun tyngeh naduh kaba sdang, hynrei kim shym la lah ban thep kol haduh kaba kut ki 90 minit.
Watla ka ailad ba kin ïakhun ïa ka extra time, hynrei ym shym la don mano mano ba lah ban pynkhih jar. Dei ha ka jingïashut tie-breaker ba ka Khimusniang ka la tam da 4-2 kol na ka bynta ban khur syndon ïa ka jingjop.
Te kumta ka Khimusniang ka la iohpdiang ïa ka khusnam pisa kaba T. 1 lak tyngka bad ka Ladthadlaboh ka la ïoh T. 50,000 tyngka ryngkat ki syrnod bad ki trophy. Ïa ka nam Man of the Match la ïoh da u Reform Pale na ka Khimusniang, Best Goalkeeper ka leit sha u Ïalamlang Biam na ka Ladthadlaboh, ïa ka Top Scorer la ïoh da u Primrose Lamat n aka Demthring SC, bad Player of the Tournament ka leit sha u Mediphrangki Pohleng na ka Khimusniang.
Ïa ki khusnam sha kitei ki kynhun ka sam da u Bah Wailadmiki Shylla, ha ryngkat ka jingïadon lang u Bah B. Phyrngap, Assistant General Manager JCUB kum u symbud kongsan, u District Sports Officer (DSO) ka West Jaiñtia Hills Bah Khroobok Passah, ki nongkitkam ka WJDSA kynthup naduh u Working President Bah EMH. Passah, General Secretary Bah Lammat O Laloo nalor kiwei pat.
