Shillong, Rymphang 01
Ka jingïaid lynti ka Megha -laya ha ka 79th National Football Championship na ka bynta ka Santosh Trophy 2025-26 ka la poi sha kaba kut, hadien ba ka Services ka la lah ban pynliem noh ïa ka Kerala da 1-0 kol na ka bynta ban jam sha ka quarter final ha ka sngi U Blei.
Kane ka nam jop ka la wan urlong lyngba ka shi kol ba la thep da u Abhishek Pawar ha ka minit kaba 18 hadien ba ka Services ka la lah ban ïalehkai bha pyrshah ïa ka Kerala ha kaba sdang kane ka jingïakhun kaba khatduh jong ka wat kaba khatduh kaba la long ha Silapathar Football Stadium kaba ha Silapathar, Assam.
Kane ka long ka jingjop kaba nyngkong ïa ka Services ha kaba ka la knieh noh ïa ka kyrdan basaw na ka Meghalaya, kaba la hiar sha ka kyrdan ba san bad kaba la duh rung sha ka quarter final namar tang saw tylli ki kynhun kiba ïoh rung na kawei pa kawei ka group.
Kumba ka paw ka Services bad ka Meghalaya ki la kamai mar 6 poiñ hadien ka jingjop kaba mar shisiem, lai sien ïakhaid bad mar kawei ka jingshah rem. Hynrei ka Services ka la tam lyngba ka jingïapher ha ka jingthep kol (0 la -2) kaba la pynlong ïa ka ban ïoh rung sha ka quarter final na ka Group-B.
Haba phai sha kane ka jingïakhun, ka Kerala ka la hap ban ïalehkai tang shiphew ngut ki rangïaleh -kai hadien ba u Muham-med Ashar u la shah sei da ka red card ha ka minit kaba 65 na ka daw ba u la ïoh jingsneng da ar tylli ki yellow card.
Ka jingbym lah ban jam sha ka quarter final ka dei na ka daw ka jinglah ban ïalehkai ka Megha-laya. Kane ka kynhun ka la wanrah biang da u coach uba kynsai u Bah Khlaiñ Pyrkhat Syiemlieh uba la ïalam ïa ka kynhun ïalehkai ka Jylla ban wan ha ka kyrdan ba-ar ha ka Santosh Trophy 2022-23, ha ryngkat ki rangïalehkai kaba kynsai.
Hynrei kane ka kynti kaba mynta ka Meghalaya ka la lah ban jam biang sha ka wat kaba khatduh hadien ba ka la lah ïalehkai bha ha ka lympung ïaknieh (preliminary) kaba la long ha ka nongbah Shillong ha u Nohprah jong u snem ba la lah. Te kumta kane ka kynhun ka la ïakynduh bad ki kynhun kiba khlaiñ bor kum ka Kerala, Services, Railways, Punjab lem bad ka Odisha.
Kumba ka paw ka Meghalaya ïa ka jingïa-lehkai kaba nyngkong ha ka wat kaba khatduh da ka jingjop pyrshah ïa ka Odisha da 1-0 kol, hadien ka la ïakhaid mar 3-3 kol pyrshah ïa ka Punjab bad mar 2-2 kol pyrshah ïa ka Services. Kane ka kynhun ka la mad ïa ka jingshah shah rem da 3-0 kol ha ka Kerala hashwa ba kan ïakhaid mar 2-2 kol pyrshah ïa ka Railways, ha ka sngi Saitjaiñ.
Watla ka Meghalaya kam shym la lah ban jam sha ka quarter final, hynrei ka la lah ban thep 8 kol bad shah thep 10 kol ha kaba ka la don kham hakhmat ban ïa ka Odisha, kaba la don ha ka kyrdan ba shatrai jong kane ka group.
Ki jingïakhun quarter-final kin long ha ka sngi Ba-ar hapdeng ka Bengal pyrshah ïa ka Services, ka Tamil Nadu ïa ka Punjab, ka Assam ïa ka Kerala bad ka Rajasthan ïa ka Railways. Katba ki jingïakhun semi final kin long ha ka 5 tarik bad ka final kan long ha ka 8 tarik mynta bnai.
