Imphal, Rymphang:
Ka Ïingkashari ba kyrpang jong ka kynhun National Investigation Agency (NIA), Manipur Number 1, ha ka 29tarik, Kyllalyngkot, ka la shim khia halor ka jingkynnoh ba la mudui pyrshah ïa lai ngut kiba shah kynnoh ha kaba ïadei bad ka jingshah rahbor bad shah pynïap bashyrkhei ïa ki lai ngut ki kynthei bad lai ngut ki khynnah, ba kynthup ïa uwei u khyllung ba dang 8 bnai, ha ka Jiribam distrik.
Kiba shah kynnoh halor kane ka jingjia, ki dei kiba la tip kyrteng kum u Thanglienlal Hmar ba la tip ruh da ka kyrteng kum u Boya (40), u Lalrosang Hmar ba la tip ruh kum u Rosang (24), baroh arngut ki dei ki nongshong shnong jong ka shnong Moinathol kaba don ha Dilkhosh Grant, Cachar distrik jong ka Assam bad u Khopuimoi Hmar ba la tip ruh da ka kyrteng kum u Puia (33) na ka shnong Keisel Punji, Borobekra, Jiribam, kine mynta ki dang shah set ha Temporary Jail, Jiribam. Ki la shah ïalam hakhmat ka ïingbishar lyngba ka jingïakren ha ka durkhih.
