Imphal, Rymphang:
Ka sorkar Manipur ka dang pynsted ïa ka jingpynbha ïa ki briew kiba la shah pynkynriah jaka ne ki Internally Displaced Persons (IDPs) ha kylleng ka jylla, ha kaba palat 3,700 tylli ki longïing, kumba 16,500 ngut ki briew, ki la lah ban pynkynriah jaka haduh mynta, la ïathuh ki heh sorkar ha ka 29 tarik u Kyllalyngkot.
Ka State Level Committee kaba la pynïaid da u Chief Secretary u Dr. Puneet Kumar Goel, ha ryngkat ki komiti katkum ki distrik ba la pynïaid da ki District Magistrate, ki la treikam lang na ka bynta ban pynïaid ïa ki rukom pyntreikam ha kaba ïadei bad ka jingpynbiang ïa ki jaka shongneh na ka bynta jong ki.
Ka rukom treikam jong ka sorkar ka ïaid palat ïa kaba shu pynkynriah na ki jaka ai jingïarap, ka pynleit jingmut ruh ha kaba pynphai biang ïa ki lad kamai, ka jingpule, bad ka jingbha jingmiat jong ka imlang sahlang baroh kawei.
Haduh u bnai Nohprah, 2025, la pynbha pat ïa palat 2,200 tylli ki longïing.
Ban pynneh pynsah ïa ka jingkynriah jaka, kumba 7,000 tylli ki ïing ki la shah mang ban ngat ha ka jingpyntreikam jong ka Special Pradhan Mantri Awas Yojana-Gramin (PMAY-G) na ka bynta ban shna biang ïa ki ïing kiba la shah pynjulor pura, ha kaba ki unit ki don ha ki kyrdan bapher bapher jong ka jingpyndep.
Ka sorkar ka la pyllait kumba T.1,124 klur na ka bynta ka jingpynkynriah jaka bad ka la buh ïa ka thong kaba khraw ban pynkynriah jaka ïa palat 10,000 tylli ki longïing, palat 40,000 ngut ki nongphetwir , haduh ka 31 tarik u Lber, 2026.
“Ka jingpynbha pat ïa baroh ki briew kiba la shah pynkynriah ha ka por kaba biang bad kaba shngaiñ ka dang long ka jingthmu ba kongsan tam jong ngi,” ong u Dr. Goel, da kaba pynksan ïa ka jingangnud jong ka sorkar ban pynphai biang ïa ka jingshong suk shongsaiñ bad ka jinglong jingman ha ki jaka ba shah ktah.
