Shillong, Rymphang 02
Ka lympung ïalehkai U-12 Football League 2025-26 ba la pynïaid da ka Shillong Sports Association (SSA) ka la jam sha ka quarter final ha kaba ki phra tylli ki kynhun kin pynkhreh ïa ka jingïakhun ha ka sngi Ba-ar ha SSA Stadium, Polo.
Ka jingïakhun quarter final kaba nyngkong kan long hapdeng ka Shillong Lajong FC pyrshah ïa ka Pynthorbah SC ha ka por 9:30 mynstep, kumjuh ka Nongkolew SC ïa ka PFR FA ha ka por 11 baje, ka Nongthymmai Nongkynrih SC ïa ka Marbisu SC ha ka por 12:30 bad ka Umphyrnai SC ïa ka Langsning FC ha ka por 2 baje nohphai sngi.
Haba phai sha ki jingïakhun jong ka U-14 ka nangjam shaphrang ha kaba ka Umphyrnai SC bad ka Shillong Lajong FC ki la long ki kynhun kiba la ïoh ban thep kol bun.
Ha kane ka jingïakhun, ka Umphyrnai ka la pynliem noh ïa ka Laitkyrhong SC haduh 10-1 kol ha kaba u B.Kharkongor u la thep marwei haduh saw kol ha ka minit kaba 2, 18,30 & 33. Katba ïa kiwei pat la pynbud da u T.Sohtun (26), R.Dkhar (29), B.Nongkhlaw (40), D.Nongkhlaw (47), S.Umdor (49) bad kawei la ïarap pynthep da ka Laitkyrhong ha ka minit ba 54. Na ka Laitkyrhong la thep da u R.Mylliem (27).
Ka Shillong Lajong ka la jop da 6-0 kol ïa ka Nongrah SC bad u L.Nongkynrih u la khur ïa ka hat-trick da kaba thep ha ka minit kaba 23, 35 & 55, katba ïa kiwei pat la thep da u M.Marweiñ (18), F.Kharkrang (20) bad u W.Nongsiej (36).
Ka Mawshbuit SC ka la shah rem da 1-5 kol ha ka PFR FA. U H.Blah u la thep marwei saw kol ha ka minit kaba 11, 21,40 & 41 bad kawei pat la thep kham hashwa da u N.Kharkongor (1). Na ka liang ka Mawshbuit ka la ïoh ei shi kol lyngba ka jingïarap pynthep da uwei na ki rangïalehkai ka PFR ha ka minit kaba 32.
Ka Mawkhar SC ka la jop da 3-0 kol ïa ka Smit SC. Ïa kine la thep da u V.Mawsor ha ka minit kaba 27, kumjuh u N.L Nonglait (42) bad u D.Ryntathiang (52).
Ka Marbisu SC ka la shah rem da 1-2 kol ha ka Rangdajied United FC. Ïa kine la thep da u B.Suting ha ka minit kaba 19 bad u M.Shylla (32). Katba ka Marbisu ka la pynphai kylla shi kol da u M.Nongbsap (25).
Haba phai sha kawei pat ka jingïakhun hapdeng ka Diengpasoh SC bad ka Umlyngka SC ki la ïakhaid mar 1-1 kol.
Ki jingïalehkai jong ka U-14 kin bteng biang ha ka sngi Ba-ar ha kaba ka Summit Academy kan ïakhun pyrshah ïa ka Mawtawar SC ha ka por 9 baje, kumjuh ka Pynthorbah SC ïa ka New Challenger ha ka por 10:20 mynstep, ka Langsning FC ïa ka Nongthymmai SC ha ka por 11:50, ka Sohiong SC ïa ka Mawlai SC ha ka por 12:50, ka Lumshyiap SC ïa ka Nongthymmai Nongkynrih SC ha ka por 2 baje bad ka Nongkolew SC ïa ka Diengpasoh SC ha ka por 3 baje nohphai sngi.
