Shillong, Rymphang 02
Ka Khasi Students’ Union (KSU) Lummawbah Unit ha ka lah sngi U Blei ka la plie ïa ka Lummawbah Week bad ka jingthmu jong kane ka long shi bynta ban pyllait ïa ki khun samla na ki jingsniew.
Ïa kane la plie da u Samla Eric Nongkynrih, Sports and Cultural Secretary ka KSU CEC ha ka jingdon ryngkat ruh u Rangbah shnong ka Dorbar shnong Lummawbah, bad kiwei kiwei.
Na ka liang u Rangbah Shnong ka Lummawbah haba kren shuwa ban sdang ïa ka jingïalehkai u la kyntu ïa ki nongïalehkai baroh ba kin long kiba bat bha ïa ka por namar ka por ka la dei ban ïalehkai hynrei ki rangïalehkai pat kim pat ïa wan sha madan.
U la kitbok ruh ïa baroh ki kynhun ki ban sa ïakhun ha kane ka lympung ba kin ïalehkai bha. Hashwa ban sdang ka jingïalehkai la ïashim bynta lang baroh ban ïa rwai ïa ka jingrwai ‘Ri Khasi Ri khasi’.
La sdang ïa ka jingïalehkai hapdeng ka ‘Tylli Kawei’ bad ka ‘Bom ba klat’ ha kaba ka ‘Bom ba klat’ ka la jop lyngba ka jingthep 1-0 kol. Hadien kane ka bteng ruh sa kiwei ki jingïalehkai.
Kum ban shu kdew hangne ba ka jingpynlong ïa ka Lummawbah Week ka long shi bynta ban pyllait ïa ki samla jong ka shnong na ki jingsniew ba bun jait khamtam eh u drok uba la kynrei bha ha kine ki sngi.
