Shillong, Rymphang 02
U Myntri Sorkar Jylla, Bah Sosthenes Sohtun u la kubur halor ka jingeh ba ïadei bad ka jingjaboh ka lyer ha Byrnihat, da kaba pynshong nongrim ïa kane ha ka jingmih jong ka lyer na ki karkhana kiba don ha baroh arliang khappud jong ka Meghalaya-Assam.
“Ka jingjaboh jong ka Byrnihat ka dei ka mat kaba ïasam lang bad ka Assam. Ngi donkam ïa ka tnad Sorkar Pdeng bad ka Assam Pollution Control Board ban leh da kaba tyngeh pyrshah ïa ki karkhana kiba pynkheiñ aiñ,” ong u Bah Sohtun ha ki nongthoh khubor ha ka Lah Sngi U Blei.
U la ban jur ruh halor ki jingpyrshang ka Sorkar ban shimkhia ïa kane ka jingeh, da kaba kdew ïa ki jingeh ha ka ban ïoh ïa ki jingtip ha ka por kaba biang bad ka jingmlien jong katto-katne ki karkhana kiba pynkheiñ kyndon.
“Ngin sa buddien ïa kane bad ka tnad ba dei khmih ban pynsted ïa ka jingpeit bniah man ka por bad ka jingpynshitom ïa ki nongpynjaboh,” la bynrap biang u Bah Sohtun.
