Shillong, Rymphang 02
Ki shipai Border Security Force (BSF) ki la ïoh ban kurup noh haduh 18 tylli ki masi ïa kiba la thmu ban shalan bad khaïi tuh sha Ri Bangladesh lyngba ki khappud.
Katkum ka khubor kaba la ïoh na ki pulit la ong ba u Post Commander, C-Coy, 4th Bn., BSF kaba ha BOP Hawaitilla ha West Jaiñtia Hills u la ai ka jingujor ba ha ka 28 tarik jong u bnai ba la lah, ha ka por kumba 5.50 janmiet, ki BSF ki la ïoh bat noh ïa uwei u khar Bangladesh ba la tip kyrteng u Abdulla Al Numan ha ryngkat bad saw tylli ki masi kiba la thmu ban khaïi tuh sha Bangladesh lyngba ka khappud ba khlem pat ker ha lynter jong ka BP No. 1287/6-S. Ha kawei pat ka khubor, u Post Commander, C-Coy, 4th Bn., BSF, BOP Hawaitilla ha West Jaiñtia Hills u la ai ka jingujor ba ha ka 28 tarik jong u bnai ba la lah, ha ka por kumba 11.30 mynmiet, ki shipai BSF ki la ïoh ban kurup haduh khyndai tylli ki masi na kawei ka jaka kaba khlem pat don jingker ha lynter jong ka alignment jong ka BP No. 1286/1-S.
Kumjuh na ka liang jong u Post Commander, F-Coy, 4th Bn., BSF, BOP SP-Tilla ha West Jaiñtia Hills u la ai ka jingujor ba ha ka 28 tarik jong u bnai ba la lah, ha ka por kumba 7.25 janmiet, ki shipai BSF ki la ïoh ban kurup noh ïa san tylli ki masi na kawei ka jaka kaba khlem pat don jingker ha lynter jong ka alignment jong ka BP No. 1290/MP.
