Shillong, Rymphang 02
Ki bor District jong ka East Khasi Hills kila pynjari ïa ka kyndon 163 BNSS, kaba khang pyrshah ban khaïi, buh bad die ïa ki dohkha ba wan shalan be-aiñ na Ri Bangladesh.
La khang pyrshah ban shalan ïa ki dohkha Bangla khlem ki kot ki sla kiba biang, ban pyndonkam ïa kino-kino ki kam, ki lieng, ban ïarap, ai jaka sah lane ïarap ïa ki briew kiba donkti ha kum kine ki kam be-aiñ hapoh u pud u sam jong ka district.
Ïa kane ka hukum la pynmih halor ki khubor ba ïohlum ba ka don ka jingkhaïi be-aiñ ïa ki dohkha ba wanrah na Bangladesh lyngba ki lynti khappud bapher-bapher, ki wah, ki surok bad ki jaka ïew hapoh ka Jylla.
Ka hukum ka ong ba kane ka khaïi be-aiñ bad pynrung tuh ïa ki dohkha Bangla ka dei ka jingpynkheiñ ïa ki kyndon ka Custom bad kiwei ki kyndon ka Food Safety bad kiwei kiwei.
Ka hukum ka ong ruh ba kum kane ka jingdie bad jingsam be-aiñ, khlem da peit bniah bad khlem pynshisha ïa kine ki dohkha ba wan nabar ri ka buh jingma kaba khraw ïa ka koit ka khiah ki paidbah bad ka jingkhuid jingsuba, ka ktah jur ïa ka kam ri dohkha ha Jylla bad ka wanrah ruh ïa ka jingduhnong ha ka liang ka ïoh ka kot ïa ki nongkhaïi dohkha ba dei hok bad ka Sorkar Jylla.
Kano kano ka jingpynkheiñ ïa kane ka hukum kin ngat ha ka jingpynsajia katkum ka kyndon 223 jong ka BNS bad kiwei ki kyndon aiñ kynthup ka Custom Act, Foreigners Act, Passport Act bad kiwei kiwei.
Kane ka hukum kan treikam noh mardor tad haduh da pynmih da kawei pat ka hukum.
