Shillong, Rymphang 02
Ka jingrai ‘boycott’ ka Pakistan ban yn ïakhun pyrshah ïa ka India ha ka T20 World Cup kan long ka jingduhnong kaba khraw ïa baroh kiba don bynta ha katei ka lympung ïalehkai jong ka ICC.
Kumba ka paw na ki jingïakhun kitei ki ar tylli ki ri ba marjan ki la wanrah ka jingïohnong bad la antat ba kan kot shaduh USD 250 million (palat 2200 klur tyngka). Ka jingïakhun hapdeng jong ki ka long tang ha ki jingïalehkai kiba bun tylli ki ri ki ïashim bynta lang namar ka jingïapher jingmut hapdeng jong ki. Te kumta haba kitei ki ar tylli ki ïakhun pyrshah ka long ka jingïohnong ïa ka ICC khamtam ha ki lympung ïalehkai jong ka pyrthei.
Lah ban kdew ba ha ka sngi U Blei, ka sorkar Pakistan ka la pynbna paidbah ïa ka rai jong ka ban ‘boycott’ ïa ka jingïalehkai ka ban long ha Colombo kaba la buh ban long ha ka 15 tarik mynta u bnai.
Lada ka Pakistan kan neh ha ka nongrim jong ka, ka don ha ka jingma ban duhnong da ki million ha ka khajna, katba ka jingpynkylla kan wanrah ruh ïa ka jingma kaba khraw ha ka liang ka pisa tyngka ïa ka ICC bad ïa ka nongpynïaid ïew jong ka India, ka JioStar, kaba la dep ban pyrshang ban ïakren biang ïa ka jingïateh kular kaba 3 billion dollar bad katei ka synjuk ïalehkai ka pyrthei.
Katei ka nongpynïaid ïew ka lah ban mad ïa ka jingduhnong ha ka jingpathai (advertising) kaba la antad ba kan long hapdeng T. 200 klur bad T. 250 klur tyngka, haba kheiñ ba ka por kaba 10 sekhon kaba ka la kamai haduh T. 40 lak tyngka.
Watla ka India ka lah ban kamai poiñ pura lada ka jop da ka walkover, ka ICC ka dangbat ïa ka bor ban pynngat ha ka jingpynshitom da kaba daiñ kuna ïa ka PCB.
