Shillong, Rymphang 02
Ka Deputy Commissioner ka Food Safety Ka Kong D.B.S Mukhim ha ka sngi Nyngkong ka la pynshai ba ïa ki dohkha ba la shim nongmuna la ki don ne em ïa ki kynja nar ba long bih, la lap ba kim don eiei bad ki long kiba shngaiñ ban bam.
Ka Kong Mukhim ka la pyntip ruh ba kumba 45 tylli ki dohkha la shim nongmuna na kylleng ka Jylla bad la phah ban pynthikna ïa ki sha ka jaka peitbniah ha Kolkata. Ka kaiphod ba la ïoh na katei ka jaka peit bniah ka ïathuh ba baroh ki dohkha ba la shim nongmuna ki biang kaba long katkum ki kyndon ba la buh da ka Food Safety and Standards Authority of India (FSSAI). Ka la ong ba ki dohkha ba la lum nongmuna na kylleng ki District ki ïaid katkum ka kyndon jong ka FSSAI. Nalor ka jingpeit bniah ïa ki ha ki jaka peit bniah ba shabar ka Jylla, ka Commissionerate jong ka Food Safety ka la pynlong ruh ïa ka jingpeit bniah kaba man ka por lyngba ka Food Safety On Wheels, ha kaba ki Ophisar Sorkar ki ju leit ban jngoh ïa ki ïew ki hat bad kin lum katto katne tylli ki dohkha ban pynlong ïa ka jingpeit bniah ïa ki.
Ka la ong shuh-shuh ba ka Commissionerate kan sa sam ïa ki kaiphod ba ki ïoh hadien ka jingpeit bniah ïa ki dohkha, sha ki Jylla ba markhap kata sha ka Jylla Assam bad kan sa pynlong ruh ïa ka jingïakren halor kane ka mat bad ban trei shitom ban ïada ïa ki jingeh ba kum kine ha ki por ban sa dang wan.
Ka la kdew ruh ba ha ka jingpeit bniah ba la pynlong man ka por, ka tnad ba dei peit kam ju lap ban don ka ‘Formalin’ ha ki dohkha bad kane ka pyntikna ïa ka jinglong shngaiñ ban bam ïa ki. Ka tnad watla katta ka la ïai-bteng ban ïakynduh bad ki bor synshar ha ki Jylla ba marjan halor kane ka kam.
Ka Kong Mukhim ka kyntu ïa ki nongdie dohkha ba kin pynrung kyrteng ïalade bad ka Commissionerate of Food Safety, da kaba ka la kdew ba ki nongdie dohkha kin pynthikna ba kin treilang katkum ki kyndon ba la bthah da ka aiñ bad na ka bynta ka jingpynrung kyrteng lah ban leh ha ki ophis lane hangno-hangno ruh da ki nongtrei ka tnad.
Ka Kong Mukhim ka la bthah ïa ki nongbam ba ki dei ban da sait bha ïa ki dohkha shuwa ba kin bam bad ka la pyntip ruh ba ïa ki pylleng dohkha ruh la lum nongmuna na kylleng ki District bad la phah ban peit bniah ïa ki bad la lap ba ki don hapoh ka kyndon ba la buh, kane ka pyntikna sha ki paidbah ba kim dei ban khuslai halor kane.
Ka Kong Mukhim ka la pynkynmaw biang ba ka Commissionerate of Food Safety ka pynlong ïa kine ki jingpeit bniah ïa ki dohkha man ka por ban pyntikna ïa ka jinglong shngaiñ ki nongbam dohkha ha kylleng ka Jylla.
