Shillong, Rymphang 02
Ki nongïalam shnong ka Golflink ha ka 02 tarik u Rymphang 2026, ki la leit ban ïakynduh ïa u Myntri ka tnad Sports & Youth Affairs ka Sorkar Jylla, u Bah Wailadmiki Shylla ban pynsngew ha u halor ka jingsahkut ka um bad shlei um pat ha ki ïing ki sem. Haba kren sha ki lad pathai khubor u Rangbah Shnong ka Golflink u Bah Michael Hek u la ïathuh ba ka shnong ka la dep phah da ka jingthoh halor ka jingbym ïaid shuh jong ka um bad shlei um pat sha ki ïingbriew ha ka por ba slap.
“Na ka por sha ka por ngi la ïakynduh hynrei kam shym la don kata ka jingkit khia na ka liang jong ka tnad. Mynta ka shnong kam banse ban wan ïakynduh syndon ïa u Myntri ba dei khmih ban phah tuklar lem halor kane,” u la ong. Ha ka jingïakynduh u Bah Michael Hek u la ïathuh ba u Myntri u la phun ïa u Chief Engineer bad bthah ban leit jurip noh mardor, namar ka National Games ruh ka la jan ha ka Jylla. “Namar lada kam leh ei-ei kan long ka jinglehraiñ ïa ka tnad bad ïa ka shnong ka thaw hi baroh kawei” u la bynrap. U Bah Micheal u ïathuh ruh ba na ka liang ki nongshong shnong ki la kren shai ba lada ka tnad kam leh eiei ïa ka jaka ban pyllait ïa ka um kin khang noh syndon ïa ka VIP road. Shuh shuh u la ïathuh ba kane ka jaka pyntuid um kam shym la trei kam shuh mynta da ki snem bad ka ktah shibun ïa ki nongshong shnong namar ka um ka wan sha ki ïing sah ha ka por ba slap.
