Shillong, Rymphang 02
Ka Meghalaya State Kickboxing Association (MSKA) ka la sei haduh 26 ngut ki nongïalehkai ka Jylla kiba la mih ban leit sha nongbah Delhi ban shim bynta ha ka 5th India Open International Kick-boxing Tournament ka ban sdang naduh 4 haduh 8 tarik mynta u bnai.
Kane ka kynhun ka kynthup ïa ki nongïalehkai kiba la shim bynta teng shabar ri kum ka Daniella I W Mylliemngap na Lumparing Lum-dorbar Shillong, ka Medariphyla Lyngdoh Nongbri na Smit Lemthaw ryngkat bad u Babit Kharsahnoh bad ka Belldona Pakynteiñ na Mawkyrwat.
Ïa kane ka kynhun kaba la don 9 ngut ki kynthei bad 14 ngut ki shynrang la ïalam da ki coach kiba kynthup ïa u Bah Khrawjutang M Kharsyntiew na Mairang bad Bah Fourwell Khongmalai na Wahkdait Dawki lem bad u Official Bah Lorenzo Pearson Warjri, uba long u Working President ka MSKA bad kum u Executive Member ka WAKO India Kickboxing Federation.
Kane ka jingïalehkai Kickboxing ka dei kaba la ïoh jingithuh na ka International Olympics Committee bad kumjuh na ka tnat ïalehkai jong ka Sorkar Pdeng.
Kat kum ka kyrwoh ba la pyllait da katei ka synjuk, la ong ba naduh u snem 2017, ki nongïakura ka MSKA ki la lah ban khur haduh 257 tylli ki takma na ka bynta ka Jylla. Kine ki kynthup ïa 92 tylli ki takma ksiar, 69 ki rupa bad 96 ki takma rnong. Kane ka synjuk ka la khur ruh 54 tylli ki takma ha ki lympung ïalehkai bar ri bad 9 tylli ki takma na ka bynta ka NEHU ha ka All India University Games naduh u snem 2019.
Shuh shuh ka la pynpaw ruh ba naduh 26 tarik mynta u bnai haduh 1 tarik u Lber, ki ‘thei ïakura kin mihkhmat ïa ka Jylla sha ka East Zone Khelo India Asmita Women League ka ban long ha Siliguri ha kaba yn wan shim bynta da 9 tylli ki jylla na ka thaiñ shatei lammihngi.
Ha ka jingïalang ha ka lah sngi U Blei hashwa ba kin mih na ka nongbah, la ïadon lang u President ka MSKA u Bah Shaiborlang Lyngdoh Mawphlang bad uba long u General Secretary ka Blind Football Association, ha kaba u la pynshlur ïa baroh ki nongïalehkai ba kin ïalehkai bha ha katei ka lympung khnang ba kin lah ban khur takma na ka bynta ka Jylla hi baroh kawei.
