Shillong, Rymphang 02
Ki dkhot jong ka Federation of Khasi Jaiñtia and Garo People (FKJGP) Shillong City ha ka sngi Nyngkong jong ka taïew ki la shah khot hajir sha Thanad Sadar halor ka jingkynnoh ba ki la ktah kti ïa u wei u nonghikai bar jylla uba hikai ha ka Time Coaching Centre.
Ki arngut ki dkhot ka seng kiba la shah khot hajir ki long u samla Saimon Myrthong, Presi -dent FKJGP Nongmyn-song Circle bad u Gary Thangkhiew, Assistant Organising Secretary FKJGP Mawlai Circle.
Ïa kitei ki ar ngut ki samla ba shah khot hajir la leit ban synranlang da ki phew ngut ki dkhot ka seng ha ryngkat ki nongïalam ka FKJGP sengkmie.
Haba kren sha ki lad pathai khubor u Samla Khrawkupar Nongsiej, Chief Organising Secretary FKJGP sengkmie u la ïathuh ba ha u bnai Nailar (August) 2025, kawei ka samla Khasi ka la shah jrong kti ha u tei u nonghikai bar jylla bad ki dkhot ka seng hadien ba la ïoh ka jingujor ki la leit mar-mar ban ïa kynduh bad u tei u nonghikai ban ïakren.
Kumta u la ïathuh ba mynta ka sngi ki pulit ki la khot hajir ïa kitei ki ar ngut ki dkhot ka seng, da kaba kynnoh ba ki la ktah kti ïa u tei u nonghikai bar jylla.
“Ki dkhot ka seng ki la leit ban ïakynduh ïa u Director ba khmih ha katei ka jaka ai Coaching, kaba don pyrshah bad ka ST.Margaret ban dawa weng kam noh namar ka jingjrong kti ïa ki samla Khasi bad ngim shym la ktah kti ïa u tei u bar jylla,” la ong u samla Khrawkupar. Nalorkata, u la ong ba kane ka jingkhot ki pulit ïa ki dkhot ka seng kiba ïarap ïa ki samla Khasi ba shah leh ha ki kam bymman, ka dei ba ki mut ban pyntieng pynsmiej ïa ki dkhot.
“Ïa ki dkhot ka seng ki pulit ki la pynngat kyndon, da kaba ong ba ki la pynmynsaw ïa u tei u nonghikai, hynrei na ka liang ka seng ka buh ha ka jingstad jong ka tnad pulit ban bishar bad ban pynshisha la ki dkhot ki leh ne-em ïakata ka kam,” la bynrap u Bah Khrawkupar.
Hadien ba ki dkhot ka seng ki la mih na Thanad Sadar ki la pyrta jam da kaba ong ‘Ïa u mynder ngin ïa kynther’.
