Nongstoiñ, Rymphang 03
Uwei u briew ïa uba la tip kyrteng u Rakesh Sohbar u la shah rai pynrem da kaba shah set patok 10 snem ha ryngkat ka kuna kaba T.50,000/- na ka bynta ka kam bymman kaba hap hapoh ka Section 6 jong ka POCSO Act.
U Superintendent of Police ka West Khasi Hills District Bah H Kharkongor, MPS ha ka kyrwoh khubor ba la phah u la pyntip ba ha ka 9 tarik u Naiwieng, 2019, la ïoh pdiang ïa ka FIR na kawei ka nongujor kaba pyntip ba ka khun kynthei jong ka, kaba dang 15 snem ka rta ka la shah leh beijot ha u Rakesh Sohbar.
Shuh shuh u la ong ruh ba halor katei ka jingjia, la register ïa ka case pyrshah ïa u nongshah kynnoh ha thanad Shallang hapoh ka Case No. 15 (11)2019 hapoh ki Section 5(j)(ii)/6 jong ka POCSO Act, bad la shimti ïa ka jingtohkit hapoh ka jingtohkit ka WPSI Nylla Eulalia Wanniang jong ka thanad Shallang, bad hadien ba la pyndep ïa ka jingtohkit, la pynngat hapoh ki Section 5(j)(ii)/6 jong ka POCSO Act.
Nangta, u SP u la ong ruh ba hadien kane ha ka 3 tarik u Nohprah, 2025, ka ïingbishar jong u Special Judge (POCSO), Nongstoiñ, hadien ba la bishar bniah ïa baroh ki sakhi bad ki sabut ba la wanrah ha ka por jingtohkit, ka la pynrem ïa u nongshah kynnoh u Rakesh Sohbar, kumta ka ïingbishar ka la pynshitom ïa u ban set along haduh 10 (shipew) snem (Rigorous Imprisonment) ryngkat bad ka kuna ba T.50,000/- na ka bynta ka kam bymman kaba hap hapoh Section 6 jong ka POCSO Act.
Ka kyrwoh khubor na u SP, ka ong ruh ba lada um siew ïa ka kuna, u nongshah pynrem un hap ban shah set patok sa kumba hynriew bnai namar ka kam bymman pyrshah ïa katei ka khynnah kynthei.
