Shillong, Rymphang 03
Ka Synjuk ki nongñiah taxi sor bad khapsor ha ryngkat ki pulit ka Rynjah Police Station ha ka 03 tarik u Rymphang 2026, ki la pynlong ïa ka jingtalasi ïa ki nongñiah kali kamai taxi ha surok Nongmynsong.
Ka jingtalasi ka Synjuk bad ki bor pulit ïa ki nongñiah kali kamai ka long kum shibynta ban pyrkhing ba ki nongñiah kali kamai kim dei ban dih ïa ki jingdih ba pynbuaid ha ka por ba kamai kali, khnang ban lait na kino-kino ki jingmynsaw.
Ha kane ka jingtalasi la lap ba ki nongñiah kali kamai baroh kim shym la dih kyiad ha ka por ba kamai kali bad kane ka pyni ïa ka jingshngaiñ jong ki paidbah nongleit nongwan.
Haba kren sha ki lad pathai khubor u Bah Denzil Nongkynrih u la ïathuh ba ka jingtalasi ïa ki kali kamai ka dei namar ka jingïoh jingujor na ki paidbah, ba ki don ki nongñiah kali kamai kiba buaid ha ka por ba kamai bad kane kan wanrah jingma shibun haba ki shong kali.
Kumta u long, ban shngaiñ ka leit ka wan jong ki paidbah ki la pynlong ka jingtalasi ïa baroh ki kali kamai, kaba la sdang naduh ka por 1:00 haduh ka por 4:00 janmiet.
“Ngi ïohi ba ki nongñiah kali kamai ki la husiar bha ban dih kyiad ha ka por ba kamai kali bad lada ka long kumne, ki paidbah ba shong kali ruh ki suk mynsiem bad shngaiñ,” la ong u Bah Denzil.
Shuh shuh u la kyntu ïa baroh ki nongkamai kali ym tang ha Sor Shillong ba kin kiar ban dih kyiad ha ka por ba dang kamai kali khnang ban lait na ka jingmynsaw.
Nalorkata, u la ong ruh ba ym tang ïa ki kali kamai hynrei ïa ki kali shimet ruh kumjuh, namar ha kine ki por ba wat ki kali shimet ruh don ki briew kiba la dih kyiad haba ki ñiah kali bad ka shong ha ka bor jong ka aiñ ba kin leh ïa kaba donkam.
Kane ka dei tang ka jingsdang ban talasi ïa ki nongñiah kali kamai hynrei kin sa dangïai bteng pat nangne shakhmat, khnang ban wanrah ïa ka suk ka saiñ ïa ki paidbah baroh.
