Shillong, Rymphang 03
Ka Justice BP Katakey Committee ka la bthah ban pyllait noh mardor ïa ka pisa na ka bynta ban pynpra ïa ki 33 tylli ki Coke Oven Plant kiba don ha East Jaiñtia Hills bad West Khasi Hills District.
Ka Committee ka la bthah ïa ki bor pynïaid District jong ka East Jaiñtia Hills bad West Khasi Hills ban pynpra noh ïa ki 16 tylli ki Coke Oven Plant kiba don ha East Jaiñtia Hills bad 17 tylli ki Coke Oven Plant kiba don ha West Khasi Hills, da kaba ai jingkynthoh ba ka lah ban long ka jingpynmih mar tuh.
“Ka Committee ka ai jingmut ban pyllait mardor ïa ka pisa ba donkam sha ki bor pynïaid District jong ka East Jaiñtia Hills bad West Khasi Hills District na ka bynta ban pynpra noh ïa ki 16 tylli ki Coke Oven Plant ba la kdew haneng ha East Jaiñtia Hills District bad 17 tylli ki Coke Oven Plant ha West Khasi Hills District bad kumjuh ruh ban pynpra noh ïa kitei ki 33 tylli ki Coke Oven Plant ba la kdew haneng mardor, hadien ba la ïoh pdiang ïa ka pisa, khnang ban weng noh ïa ka jinglah ban sdang ïa ka jingpynmih da kaba rieh,” ong u Justice Katakey ha ka kaiphod shipor kaba 34 jong u kaba la aiti hakhmat ka ïingbishar Meghalaya High Court.
“Ki Deputy Commissioner bad ki Superintendent of Police jong kitei ki district kin pynthikna ba ki karkhana kim dei ban treikam shuh haduh ban da pynpra noh,” ka la ong.
Ka komiti ka la bthah ruh ïa u Deputy Commissioner, East Jaiñtia Hills, ban pynpra noh ïa ki 16 tylli ki Coke Oven Plant hapoh ar taïew hadien ba la ïoh ïa ka pisa bad ban ai ïa ka kaiphod.
La bthah ïa ka DMR, Meghalaya, Shillong ban pynbiang ïa ka pisa kaba donkam na ka bynta ban pynpra noh mardor.
Kane ka sienjam ka long kum ka jingbud ryntih ïa ka hukum jong ka Ïingkashari Supreme Court kaba la pynmih ha ka 25 tarik Naiwieng, 2024, ha ka Writ Petition (Civil) No. 720/2023 [Druk Fuel Limited -Vs- Ka Jylla Meghalaya bad kiwei kiwei].
Katkum ka kaiphod, la antad ba ka pisa kaba donkam kan long T.42,50,000 na ka bynta ban pynpra ïa ki 17 tylli ki Coke Plant ha West Khasi Hills.
