Mawkyrwat, Rymphang 03
Ka shnong Sasniang ha South West Khasi Hills District ha ka 27 tarik u Kyllalyngkot, 2026 ka la rakhe ïa ka “Jal Arpan Diwas” kaba dei ka sngi leh kmen ki paidbah ïa ka jinglong trai ïa ka skhim JJM namar baroh ki longïing longsem kiba don kumba shispah tam ha kane ka shnong, ki jaka hikai bad ki Aganwadi Centre ki la ïoh lut ïa ka umbam umdih.
Ha kane ka sngi lehkmen la ïadonlang u Bah I Lawriniang, BDO ka Mawkyrwat C&RD Block kum u kongsan ha ryngkat lang u Bah K Nongbsaw, Executive Engineer ka PHE Mawkyrwat Division bad kiwei de ki ophisar ka tnad PHE, ki nongshong shnong ki khynnah skul bad kiwei-kiwei.
Ïa ka skhim JJM ha Sasniang la ïoh ban pyntreikam ha ka snem 2022 ha ka mang tyngka kaba T.1 klur 57 lak tam bad ha kane sngi na ka liang ka ophis PHE Mawkyrwat ka la ïoh ban aiti noh ïa ka JJM ha ka shnong khnang ba ka shnong kan pynïaid bad peit hi ïa ki jingdonkam baroh.
Ka ophis ha kane ka sngi ka la ïoh ban pynbna ïa ka shnong Sasniang kum ka Har Ghar Jal Village kaba baroh ki longïing longsem ki jaka pule bad ki Aganwadi centre ki la ïoh lut ïa ka umbam umdih.
Hadien ka jingïalang la ïoh ruh ban leit jurip ïa ki longïing longsem bad ki skul ha kane ka shnong bad la lap ba baroh ki longïing kiba don kumba shispah tam kynthup ïa ki skul, ki Aganwadi Centre ki la ïoh lut ïa ka umbam bad ka um ka la poi ha man la ki thliew ïing.
U Executive Engineer ka PHE Mawkyrwat Division u Bah K Nongbsaw ha kajuh ka por uba dei u Member Secretary ka District Water Mission SWKHD haba ai jingkren ha ka jingïalang u la ïathuh ba ka jingpynpoi um lyngba ka skhim JJM ha Mawkyrwat Block ka la poi sha ka 79%, ka Ranikor 94% bad ha ka district baroh kawei ka la poi kumba 85% bad u la buh ruh ïa ka thong ba ha u bnai Nohprah jong u snem 2026 lane u bnai Lber jong u snem 2027, ka ophis kan sa trei shitom bad pyrshang ban pynpoi um shispah na ka shispah sha baroh ki longïing longsem hapoh ka District.
U Bah K Nongbsaw u la ai khublei ruh ïa u Myntri Rangbahduh ka Ri u Narendra Modi uba la pynïoh ïa ka skhim JJM bad kumjuh ruh ïa ka VWSC bad ki nongpynïaid shnong kiba la ai ka jingïatreilang ha kaba la lah ban pyndep bad ban pynpoi um sha baroh ki thliew ïing bad u kyrmen skhem ruh ba kane ka skhim hapoh kane ka shnong kan ïai long ka jingshakri ïa ki paidbah nongshong shnong.
