Shillong, Rymphang 03
U MP ka Voice of the People Party (VPP) na Shillong Parliamentary Konstitwensi, u Dr. Ricky AJ Syngkon u la kyntu ïa u Myntri ka tnad Textiles ka Sorkar Pdeng, u Giriraj Singh ban tuklar bad ban weng ïa ki jingbym don bor synshar bad jingduna ha ka liang ka pule puthi hapoh ka National Institute of Fashion Technology (NIFT) Shillong.
Ha ka dorkhas ba la aiti sha u Myntri ka Sorkar Pdeng mynha ka sngi Ba-ar, u Dr.Ricky u la pynpaw ïa ki jingeh hapoh ka NIFT kynthup ïa ka jingbym don Director, ka jingbym don ki bor ba dei peit bad ka jingduna ki nonghikai kiba ktah ïa ka jingai jinghikai.
“Ka jaka pule don nam kum ka NIFT ka donkam ïa ka bor synshar bad ki nongpeit kaba shirta ban pynneh ïa ka jingtreikam kaba paka hapoh ka Skulbah” la ong u Dr.Ricky haba kren pynksan ïa ka jingdonkam ïa u Director ba pura bad ban pyndap ïa ki kam ba thylli.
U MP u la kyntu ruh ïa ka tnad Textile ka Sorkar Pdeng ban buh hakhmat eh ha ka ban pynbeit ïa kane ka kam bad shim ïa ki lad pynbeit kiba biang, kynthup ïa ka jingthung ïa u Director ba pura ha NIFT Shillong bad ka jingpyndap ïa ki kam ba thylli”.
