Shillong, Rymphang
Ka Meghalaya Asha Worker’s Union ka pynpaw ba ka kwah ban ïoh jingshai na u Myntri ka tnad ka koit ka khiah haba ïadei ka jingkam jong u ba ïa ka pisa ki nongtrei Asha la dep ban siew lut bad la dep ïa pynbeit.
Ka President jong ka MAWU ka Kong Mira June Marsing haba kren sha ki nongthoh khubor ha ka sngi Nyngkong ka la pynpaw ïa ka jingbym sngewïahap ïa ka jingkam u Myntri Ka Koit Ka Khiah u Bah Wailadmiki Shylla kaba u la ong ba ka jingthut ka jingsiew sha ki nongtrei Asha ka dei na ka daw jong ki, ym na ka Tnad Ka Koit Ka Khiah.
Ka Kong Mira ka la ïathuh, katkum ka jingshong jingïalang ki nongïalam ka Union bad ki Ophisar ka National Health Mission (NHM) ha ka 27 tarik u Kyllalyngkot ha ophis Directorate of Health Services (DHS), ki Ophisar ki la pynshai bad pyni ruh ïa ka daw ka jingthut jong ka jingsiew jong ki Asha kaba dei na ki MO bad ki Block Accountant, hynrei ym kumba la kren da u Myntri Ka Koit Ka Khiah u Bah Wailad.
Shuh-shuh ka la ïathuh ruh ba ha kajuh ka sngi ki nongïalam ka MAWU ki la shah khot ban shong jingïalang biang ha ka sien kaba ar hapoh Secretariat bad u Mission Director (MD) ha kaba u la kyrpad ban weng noh ïa ka jingïakhih jong ki da kaba u la kular ban pynbeit noh kloi bad ban siew noh katba lah ïa ka jingsiew ki nongtrei Asha, kaba la pynlong ïa ki ban weng noh ka jingïakhih jong ki, hadien 20 sngi ba ki sangeh treikam.
Ka la ïathuh ruh ba ha ka jingïalang bad ki Ophisar ka NHM ki nongïalam ka MAWU ki dang pan jingkheiñ ïa ka jingsiew ba dang sah bad kaba ki la ïoh jingpynshai ba sa T. 482.65 (saw klur phra phew ar lak hynriew phew san tyngka) ka jingsiew ka dang sahkut.
Ka Kong Mira ka la ïathuh ruh ba haduh ka 2 tarik u Rymphang 2026 ka Union ka dang ïoh jingkheiñ na ka NHM ba sa T. 2.88 (ar lak phra phew phra hajar tyngka) ka jingsiew ka dang sah kut ha ka tnad ka koit ka khiah.
Ka MAWU ka pynpaw ïa ka jingsngew nguh ïa ka NHM kaba la shimkhia ban pynbeit katba lah ïa ka jingeh haba ïadei ka jingbym ïoh bainong ki nongtrei Asha ba la bun bnai bad kyntu ruh ïa ka tnad ba nangne shakhmat ka jingsiew sha ki nongtrei Asha kan ïaid beit ïaid ryntih.
