Shillong, Rymphang 03
U Myntri Rangbah ka Jylla, u Conrad K. Sangma ha ka Sngi Ba-ar u la ban jur halor ka jingkylla ha ka lynti treikam jong ka Jylla ban kyntiew ïa ki jingïatreilang kiba shisha bad kiba neh slem ha ka liang ka ïoh ka kot.
“Ngi wan hangne mynta ka sngi ym ban leh tang ïa ka khaïi-pateng; ngi wan hangne ban tei ïa ka jingïatreilang”, ong u Conrad haba ai jingkren ha ka jingïalang plie ïa ka Reverse Buyer-Seller Meet (RBSM), 2026 kaba la long ha State Convention Centre, Shillong.
U Myntri Rangbah u la ai khublei ruh ïa ka tnad Commerce & Industries bad baroh ki nongshim bynta kiba la pynlong ïa ka Reverse Buyer-Seller Meet, da kaba batai ba ka dei ka “khyllipmat jong ka jingsarong” bad kdew ba ka dei ka jingïalang kaba nyngkong eh (kaba kum kane) ym tang na ka bynta ka Meghalaya hynrei na ka bynta ka Thaiñ Shatei Lam Mihngi baroh kawei.
U la ban jur ba ki jingthmu kum ka RBSM ki dei ban wanrah ïa ki jingmih kiba shisha. Haba kubur ïa ki jingeh kiba ka Jylla kaba rit ka ïakynduh, u Myntri Rangbah u la pynpaw ïa ka jingdonkam jong ka jingpyrshang kaba neh bad kaba ïaineh na ka por sha ka por.
Haba ïadei bad ka Meghalaya Livelihoods and Access to Markets Programme ba la kyrshan da ka IFAD, u la pynkynmaw ba ïa kane ka projek shisien la ai jingmut ban khang noh namar ka jingbym treikam bha hynrei naduh katei ka por la ithuh ïa ka ha ka pyrthei kum kawei na ki projek ba paka tam jong ka IFAD.
“Ym don kaei-kaei kaba lah ban kylla shi-miet shi-miet,” u la ong, da kaba pynpaw ba ka jingkylla ka donkam ïa ka jingaiti lut, ka jingpynleit jingmut, bad ka jingïohi jngai kaba shai.
Halor ka khaïi-pateng jong ka pyrthei, u Myntri Rangbah ka Jylla u la kdew ba ka jingbym tikna ka wanrah ruh ïa ki lad ki lynti ha ki tnad treikam kum ka ‘Textiles’, ki jaiñ, ki kam shna jingshna da ki kti, ki kam suh snieh, ki juti, bad ki dawai-dashin.
U la ong ruh ba ka Meghalaya ka la shim ïa ki lad jingpynkylla kiba kongsan ban kyrshan ïa ka mariang, kynthup ïa ka jingweng noh ïa palat 400 tylli ki kyndon, haduh jan 70 tylli (na ki) ha ka tnad Labour, bad ka jingwanrah ïa ka ‘Unified Investor Portal’ na ka bynta ki jingpynkhuid ba khlem jingeh.
Haba pynpaw ïa ki nuksa jong ka jingpynkiew dor, u la kdew ïa ki nongrep Sohtrun kiba ki mar jong ki mynta la shalan shabar-ri hadien ba ki la pyndep ïa ki kyndon jingshngaiñ jong ka pyrthei, bad ki SHG jong ki kynthei kiba don bynta ha ka jingpynkhreh ïa u shynrai.
Haba ban jur halor ka jingkiew kaba pynshong nongrim ha ka jingïatreilang, u la pynpaw ba ka jingthmu ka long ban pynïasoh ïa ki nongthied bad ki nongrep lem bad ki nongseng kam seng jam ha ki jingïatreilang kiba kit jingmut, bad kiba neh slem.
Ha kaba pynkut, u la batai ïa ki nongrep, ki MSME, ki nongthied, bad ki nongshim bynta ba ki long kum “ki bynta ba kongsan eh jong kane ka prokram,” bad pynpaw ïa ka jingkyrmen ba kane ka jingïalang kaba ar sngi kan long ka jingsdang jong ki jingïatreilang kiba neh.
Ha kane ka sngi, u Myntri Rangbah u la pyllait paidbah ruh ïa ka ‘MeghaRise Logo & Brand’ bad ïa ka ‘State-Level MSME Portal’ ban pynkhlaiñ ïa ka ‘Branding’, ban pynbha ïa ka jingïohi, bad ban pynsuk ïa ka jingïoh bynta ïa ki lad shakri ‘digital’ na ka bynta ki nongseng kam seng jam ha kylleng ka Jylla.
Na ka liang u Symbud Myntri Rangbah ka Jylla ka tnad Commerce & Industries, Bah Sniawbhalang Dhar u la pynpaw ka jingsngewnguh ïa ki nongseng kam seng jam bad ki nongshim bynta napoh ka thaiñ bad batai ïa kane ka jingïalang kum “ka jingïalang ka ban sah kynmaw ha ka histori.”
U la pynpaw ba ka RBSM ka long “kaba pher ha ka nongrim na ki jingpyninam ne ki Ïew ki Hat khaïi-pateng ba ju long man ka por,” naba la pynwandur ïa ka kum ka rynsan ba ïadei bad ki nongthied – kaba pynleit jingmut ha ka jingïadei kaba la buh ryntih hapdeng ki kam khaïi-pateng.
Shuh shuh u la pyntip ba ka ‘B2B Meet’ 2026 ka sakhi ïa ka jingïashim bynta na 28 ngut ki nongthied (bar-ri) kiba mihkhmat ïa 16 tylli ki ri: South Africa, Zimbabwe, Slovakia, Turkiye, Nepal, New Zealand, Russia, Bahrain, Kenya, Australia, Uganda, Gambia, Azerbaijan, Sri Lanka, Canada, bad Romania da kaba kynthup ïa ki tnad kum ka ‘Agri and Food Processing’, ‘Handlooms and Handicraft’, ka riam ka beit bad ‘Textiles’, ki mar ba shna na u siej bad u dieng, musli-musla, ki dawai kynbat bad kiwei. Palat 100 tylli ki nongdie MSME na kylleng ka Jylla ki la ïashim bynta ha kane ka prokram.
