Shillong, Rymphang 03
Ar ngut ki runar ki bym lah ban ithuh, ki la prong tuh ïa ka kamra jong ka Revenue, Budget and Finance Department jong ka Khasi Hills Autonomous District Council (KHADC) ha ka step jong ka lah sngi U Blei.
Kane ka jingjia ka dei kaba la jia ha ka por kumba 6 baje eiei mynstep ha kaba ki la ïoh ruh ban tuh ïa ka pisa.
Kane ka jingjia ka la paw ha ka por 11 baje mynstep hadien ba ki nongtrei ki la wan sha ophis bad lap ba ki kot ki sla ki la pra lut ha madan ha ryngkat ki dak ki shin jong ka jingpyrshang ban lied jubor ïa ki duli.
Haba ïadei bad kane na ka liang ka Council ka la ujor da ka ejahar ha Lumdiengjri Police Station hynnin ka sngi bad na ka liang ki pulit ha ka step jong ka 03 tarik ki la leit mar-mar sha KHADC ban tohkit bniah halor kane ka jingjia.
Haba kren sha ki lad pathai khubor, u Bah Denzil Raynard Chen, Executive Member ka KHADC uba dei khmih ïa ka tnad Elaka, u la ïathuh ba lyngba ka kor CCTV la ïohi ïa ar ngut ki briew kiba rung sha ka ophis ha ka por kumba 6 baje mynstep, ha kaba u wei u la kiew sha jrong bad uwei pat sha poh.
U la ïathuh ba u wei na kine u la kah dur ïalade hynrei u wei pat u la tap ïa ka khlieh.
U Bah Denzil u la ïathuh ba ki duli la lap ba ki la julor bad kawei ka sweater bad ka pla la lap hajan kawei ka jingkhangïit, kaba pynpyrkhat ba ki lah ban rung tuh na kane ka jaka.
“Ïa kane ka jingjia ym shym la tip, tad haduh ba ki nongtrei ki la wan trei bad ki sa ïohi ïa kine baroh. Na ka liang ki pulit ki dang thwet ïa kitei ki briew kiba donkti ha kane ka kam” u la ong.
