Shillong, Rymphang 03
Ka ïingbishar Meghalaya High Court kala pynkynriah tarik ïa ka mukotduma ba ïadei bad ka jingpynkynriah ïa ki 342 tylli ki longïing na Them Metor, Them Iew Mawlong.
Ka ïingbishar ba la khlieh da u Justice B Bhattacharjee kala pynmih ïa kane ka hukum haba shong bishar ïa ka mudui ba la ujor da ka Harijan Panchayat Committee pyrshah ïa ka High Level Committee da ka Sorkar Jylla, ha ka sngi Nyngkong.
Ka ïingbishar kala pynsangeh shuwa ïa kane mukotduma na ka bynta saw taïew, haba pynpaw ba ka don ka mukotduma ba don jingïadei bad ka, kaba dang sahteng ha ïingbishar Division Bench.
“Ki nongïasaid aiñ ba mihkhmat ïa ki liang mamla kila pyntip ïa ka mukotduma ba ïadei bad kane ka kam, kaba sahteng hapoh ka Division Bench. Namar kata, buh noh ïa kane ka kam hadien 4 taïew,” ong ka ïingbishar ha ka hukum.
Ha ka 29 tarik Kyllalyngkot, u Symbud Myntri Rangbah ba khmih ïa ki kam pynroi sor Bah Sniawbhalang Dhar u la pyntip ba ka Sorkar kan sa pynlong ïa ka jingïalang bad ka Harijan Panchayat Committee hadien ka Dorbar Mang tyngka jong ka Jylla, ban ïakren halor ka jingpynkynriah ïa ki 342 tylli ki longïing na Them Metor, ha Them Iew Mawlong.
“Ka dang don kaei kaei kaba sah kaba dang donkam ban ïakren. Nga sngew ba hadien ka jingkut jong ka dorbar mang tyngka, ngin sa shong jingïalang halor kane,” u la ong.
