Shillong, Rymphang
Ka Hynñiewtrep Integrated Territorial Organisation (HITO) Jaiñtia Hills ka la phah jingthoh sha u Managing Director ka Meghalaya Transport Corporation, Shillong ban tuklar lem haba ïadei ka jingkynduh jingeh ki paidbah hapoh ka Jowai Depot.
Haba kren sha ki nongthoh khubor u President ka HITO Jaiñtia Hills u Bah Burom Dkhar u la ïathuh ba ka seng ka la ïoh jingujor na ki paidbah ïa ki jingbym bit bym biang kiba hapoh ka Jowai Depot bad pynpaw ruh ba ka HITO ka la pynlong ruh ïa ka jingjurip bad lap ïa ka jingshisha.
Shuh-shuh u la ïathuh ba na ka liang u Director ka MTC u la kular ban pynbha ïa ki jingduna bad ïa kane ka kam u la kular ban pyndep hapoh arbnai. Nalor kata u la ïathuh ruh ba ki la ïakren ruh halor ki nongtrei jong ka Jowai Depot ha kaba kum ki Assistant Depot Manager, LDA, Conductor kim biang bad ka jingtrei jong ki ruh kam biang bad na ka liang u Director u la kular ban ai jingpynbna noh hapoh shibnai kumjuh ba ka tnad kan ïaleh ban pynbiang lut ïa ki jingbym bit bym biang ha baroh ki District jong ka Jylla.
