Shillong, Rymphang 03
Ki kam tuh kam thiem ki la nang ïai bteng na kawei ka sngi sha kawei pat, kaba la wanrah ïa ka jingbym shngaiñ ïa ka imlang sahlang bad ïa kane lah ban sakhi na ki jingshah tuh kiba dang jia dang ha kine ki sngi.
Katkum ka khubor kaba la ïoh na ki pulit la ong ba ha ka 31 tarik jong u bnai ba la lah, ki runar bym lah ban ithuh ki la prong tuh hapoh ka ïing jong u Yoowanmi Myria ha Nongshiliang, Nongthymmai, Shillong bad ban rah tuh ïa kawei ka TV, ki Bluetooth speaker bad kiwei kiwei ki tiar.
Ha kawei pat ka khubor la ong ba ha ka 1 tarik mynta u bnai, ha ka por 11.20 mynmiet, u Kupbor Shaphrang Lyngdoh Mairang u la pyntip sha ki pulit ba ki runar bym lah ban ithuh, ki la tuh ïa ka arshaka ka jong u, kaba don ïa u registration number ML05-AB-1150 na ka thaiñ Shanmari, Golf Links, Shillong.
Na ka liang jong u Gurmeet Singh, u la pyntip ba ha ka 1 tarik mynta u bnai, u la lap ba ki runar bym lah ban ithuh, ki la tuh ïa kawei ka jingdeng rupa bad bun ka ksiar kiba shongdor haduh T.2.5 lak na ka ïing sah wai jong u, kaba don ha Rilbong, Shillong.
Ha kawei pat ka khubor, u Rohit Bajoria u la ai ka jingujor sha ki pulit ba ha ka 19 tarik jong u bnai ba la lah, ki runar bym lah ban ithuh, ki la tuh ïa ki tiar ba kynthup ïa u copper strips bad ki lightning conductor kiba shongdor kumba T.1 lak, kiba la pyndait ha ka ïingsah jong u, ha Police Bazar, Shillong.
Na ka liang jong u Dondor War u la ai ka jingujor sha ki pulit ba ha ka 30 tarik jong u bnai ba la lah, ha ka por kumba 11 baje mynstep, u la lap ba haduh phra tylli ki battery, ar tylli ki RAC cards bad kawei ka CEF card ki la jah najan jong ka mobile tower kaba don ha Ummir, Mawpdang ha East Khasi Hills.
Ha kawei pat ka khubor, ki pulit ki la ïoh pdiang ka jingpyntip ba ha ka 30 tarik u bnai ba la lah, ki runar bym lah ban ithuh ki la tuh ïa kawei ka arshaka kaba don ïa u registration number ML04-D-2126 na Tredeilin Chutwakhu, Jowai ha West Jaiñtia Hills.
Ha kawei pat ka khubor, u Tuithong Onshing u la ai ka jingujor sha ki pulit ba ha ka 28 tarik jong u bnai ba la lah, ki runar bym lah ban ithuh ki la tuh ïa ki ar tylli ki tyndong LPG, kawei ka Phillips Air Fryer, kawei ka Bajaj OTG bad ka induction cook top na ka ïing sah jong u, kaba don ha Hawakhana, Tura ha West Garo Hills.
