Shillong, Rymphang 03
Ka Justice BP Katakey Committee ha ka ‘Interim Report’ kaba 34 (jong ka) kaba la aiti sha Meghalaya High Court, ka la pynpaw ïa ka jingsngewkhia halor ka jingbym lah ban pyndonkam ïa ka pisa kaba T.100 Klur kaba la thep ha ka Central Pollution Control Board (CPCB).
La pyntip sha ka komiti ba T.17,52,33,394 la mynjur da ka ‘Oversight Committee’, hynrei ka CPCB kam pat shym la pyllait ïa ka pisa, kaba khanglad pat ïa ka jingpyntreikam ïa ka projek.
“La khmih lynti ba ka ‘Oversight Committee’ kan ïakynduh ha u bnai Nohprah, 2025 ban khmih bniah ïa ki jingtyrwa kiba dang sahteng,” ong u nongmihkhmat jong u Member Secretary.
Ka komiti ka la bthah ïa ka CPCB ban pyllait noh mardor ïa ka pisa ba la ai jingmynjur bad bthah ruh ïa ka tnad Mining & Geology ban ïoh ïa ki jingtyrwa na ka bynta ka pisa kaba dang sah.
“Ka tnad Mining & Geology ka dei ban shimkhia mardor ban pyndonkam ïa ka pisa ba la buh ha ka CPCB,” la ai jingmut ka komiti.
Ka komiti ka la pan ruh ïa ki jingtip bathymmai shaphang kiwei pat ki prokram lad kamai na ka bynta ki nongtih dewïong, ka jingkhang ïa ki par dewïong, bad ka jingsiew (demurrage) hapoh 15 sngi.
