Bengaluru, Rymphang:
U dkhot jong ka Supreme Court High-Power Committee on Agrarian Reforms bad u Agriculture Scientist u Devindar Sharma, u la pynpaw ba ka kaiphod ba la ai da ka Organisation for Economic Co-operation and Development (OECD) ka la pynpaw ba ki nongrep jong ka ri ki la duhnoh haduh T. 110 lakh klur hapdeng u snem 2000 bad 2025.
U la ong ba ka OECD ka wanrah ïa ka jingpule kaba pynshong nongrim ha ka jingwad bniah kaba ai jingïarap ïa ki nongpynmih man la u snem. “Ka kam rep ha India ka dei tang ma ka ha ka pyrthei kaba pynduhnong”, u la ong.
U Sharma u la ong ba ka jingpynïap ïalade jong ki nongrep ka dei ka jinglong ha ka pyrthei bad u la bat ïa ka jingpynwandur ïa ka ïoh ka kot kum ka daw jong ka jingeh. Ka SC panel ka dang shim ïa ki jingai jingmut na ka Farming Committee ha kylleng ka ri India bad ïa ki jingai jingmut yn sa ai sha ka jylla Karnataka.
“Kawei kaba ngi donkam ban sngewthuh ka long balei ki nongrep na America, ki nongrep na Europe bad ki nongrep na Australia ki pynïap ïalade. Ka ïoh ka kot kaba la long na ki kam rep hapoh ki ri ka pyrthei ka long ka bynta kaba la hap ban khmih bniah, ha America, ka jingpynïap hi jong ki nongrep ha ki thaiñ nongkyndong ka la long da 3.5%, ki don ki por ba ka kham bun ban ïa kaba don ha ka ri, wat hadien ba ka la don ka jingïoh jingkyrshan pisa ha ka kam rep. Kumjuh, wat hapdeng ka jaka rep kaba heh, ki nongrep na Europe bad Australia ki pynïap ïalade”, u la ong.
Haba kren na ka jinglong jong ka ri India jong ki komiti ba la thaw ban peit bniah ïa ka jingeh ha ka rep ka riang bad ka jingpynïap ïalade jong ki nongrep, u la ong ba ki don palat 75 tylli kum kine ki komiti kiba trei halor ka jingeh jong ki nongrep.
“Kaba kongsan ka long ka jingpynkut ne ki lad ki lynti ban khanglad ïa ka jingpynïap ïalade jong ki nongrep. Donkam ïa ka polisi kaba ïahap ha ka kyrdan jong ka ri khnang ba yn pynbeit ïa ka mat ba la buh”, u la ong.
U la pynpaw ïa ka jingbym sngewtynnad bad u la ong haba ïanujor bad ka Mang Tyngka ba la dep, ka jingmang pisa na ka bynta ka rep ka riang ka la hiar na ka 3.15% sha ka 3.04%.
