Shillong, Rymphang 04
U Babu Kular Khongjirem uba long u nong-ïalam barim ka Khasi-Jaiñtia Deficit School Teachers Association u la pynpaw ïa ka jing-sngewkhia halor ka jingduna haduh 15,603 ngut ki khynnah ba thoh ïa ka eksam Secondary School Leaving Certificate (SSLC) haba ïanujor hapdeng u snem 2025 bad 2026.
Haba kren sha ki nongthoh khubor ha ka sngi Balang u Babu Kular u la ïathuh ba katkum ka jingtip ba ïoh na ka Meghalaya Board of School Education (MBOSE) ha u snem 2025 ki nongïakhun ïa ka eksam SSLC ki don haduh 63,682 ngut katba ha u snem 2026 ki long tang 48,793 ngut. Ka mut ka jingïapher ha ka jingdon ki khynnah ba ïaleh ïa ka eksam SSLC ka long da 15,603 ngut.
“Haba ïa nujor hapdeng ki ar tylli ki snem ka pyni ba mynta u snem ka duna palat ki nong-ïaleh ïa ka eksam SSLC, ka jingkylli jong nga ïa ka Sorkar ka long ba, lada ki duna haduh katne, ka Sorkar ka dei ban pyrkhat khia ïa kane bad kum u nonghikai nga sngewkhia ïa kane,” la ong u Babu Kular.
U la ban jur ïa ka Sorkar Jylla ba ka dei ban shimkhia ïa kane ka jinghiar kiba thoh eksam SSLC mynta u snem da kaba u la kyntu ba ka dei ban pynlong ka jingtohkit kaba bniah, da kaba kdew ruh ba lada ka Sorkar ka pynpaw ba ka sngewkhia ïa ka pule puthi ha ka Jylla ka dei ban shimkhia ban wad ïa ka daw ka jinghiar kiba thoh eksam SSLC mynta u snem.
U Babu Kular u la pynshai haba ïadei ka jingmut Regular-I ki dei kito ki khynnah ba na ki skul kiba la ïoh jingithuh na ka MBOSE, ki lah ban dei ki Skul Sorkar, Adhoc, Deficit lane ki Skul shimet, hynrei kiba la bud ryntih ïa ki kyndon jong ka MBOSE bad kine ki khynnah kim donkam ban ïaleh ïa ka eksam Selection. Katba ki Regular-II ki dei kiba ym pat ïoh jingithuh na ka MBOSE, ki don kiba dei ki skul Adhoc, Deficit lane ki Skul shimet bad kine ki hap ban ïaleh ïa ka eksam Selection ba pynlong da ka District School Education Officer (DSEO) bad lada ki pass ïa kine ki eksam kin sa lah ban ïaleh ïa ka SSLC eksam ba pynlong da ka MBOSE.
Haba ïadei ka National Education Policy (NEP) u Babu Kular u la ong ba ka long kaba phylla ba ka Sorkar ka sdang ban pyntrei kam ïa ka NEP na khlieh sha trai, kaba la pynkynduh jingeh ïa ki samla pule, u la kdew ba kaba sdang nyngkong ban pyntrei kam ïa ka NEP ka dei ka North-Eastern Hill University (NEHU). U la kyntu ïa ka Sorkar ba kan peit bha ïa kane haba ka pyntreikam khnang ba kan ym ktah ïa ki samla pule. Halor ka jingthmu ka Sorkar ban pynrung ïa ka Cummunity Intensive Skill Learning ha ka Vocational Subject ha ki skul kaba ka jingthmu ka long ba ki khun kin lah ban bud ïa ka jingleh jingkam jong ki kmie ki kpa, u Babu Kular u la ong ba kane kam dei kaba suk. Kumta u la kyntu ïa ka Sorkar ba ka dei ban pynshai kaei ka jingthmu jong ka lyngba kane ka Cummunity Intensive Skill Learning.
