Shillong, Rymphang 04
Ka Ïingbishar Megha-laya High Court ka la bthah ïa ka National Highways Authority of India (NHAI) ban file ïa ka affidavit ka ban pynthikna ïa ka jingpyndep ïa ka jingpyntrei ïa ka surok Jowai-Ratacherra hapoh jong ka 24 tarik Rymphang.
Ïa kane ka hukum la pynmih da ka division bench ba la khlieh da Chief Justice Revati Mohite Dere bad Justice W Diengdoh hadien ba la shong bishar ha ka sngi Balang ïa ka kaiphod katkum ka kam ba ïaid mynta ba la aiti da ka NHAI haba ïadei bad ka PIL ba la mudui da u (L) Kynjaimon Amse.
Ka NHAI ha ka kaiphod jong ka, ka la ong, “Ka bynta jong ka surok kaba kongsan kata naduh Jowai sha Ratacherra kala dep. Hynrei, khnang ban leh eiei ïa ka jingjia twa khyndew ha ki katto katne ki jaka ba ju twa khyndew, la ai kam kontrak la ka jong ban shna jingïada ïa ki jaka lum bad kiwei ki kam ha ki jaka ba don jingma ha shilynter ka surok Jowai-Ratacherra”.
U Nongïasaid aiñ ka NHAI u la kular hakhmat ka Ïingbishar ba ïa ka bynta kaba sah, kynthup ki kam ba ïadei bad ka jingshna ïa ki culvert ha 105 Km, yn sa pyndep noh hapoh ka ar taïew. Ka Ïingbishar kala bthah ïa ka NHAI ba kan file ïa ka affidavit ba pynthikna ban pyndep ïa ka jingshna ïa ka surok hapoh ka 24 tarik Rymphang.
