Shillong, Rymphang 04
Kum shi bynta jong ka ‘Press Tour’ sha Megha-laya ba la pynlong da ka Press Information Bureau (PIB), Sorkar India, ka kynhun ki nongthoh khubor na Karnataka ha ka Sngi Balang ka la leit jngoh ïa ka Directorate General Assam Rifles (DGAR) kaba don ha Laitkor.
Ha kane ka jingleit jngoh, la ai jingtip lyngkot sha ka kynhun shaphang ka histori ba riewspah bad ka jingkylla jong ka Assam Rifles, ka jingkhlaiñ jong ka kynhun, ka jingdonkam ha ka jingtreikam, bad ka bynta ba kongsan jong ka ban pyntikna ïa ka shongsuk shongsaiñ bad ka jingshngaiñ ha ka Thaiñ Shatei Lam Mihngi.
Ki heh ophisar ki la ban jur ïa ki jingjop jong ka kynhun ha ki kam bapher-bapher, kynthup ïa ka jingïakhun pyrshah ïa ki kam lehnoh, ka jingkhmih bniah ïa ki khappud ha shilynter u pud u sam hapdeng ka India bad Myanmar, bad ka jingïatreilang kaba ïajan bad ki bor synshar jong ka Myanmar ban tehlakam ïa ki kam be-aiñ kiba pynïaid na kawei ka ri sha kawei pat.
Ka la don ruh ka jingïakren shaphang ka kam jong ka Assam Rifles ha ki kam ïakhun kiba ïadei bad kiwei-kiwei ki ri bad ka jingphah ïa ki shipai sha kiwei-kiwei ki ri.
La pynleit jingmut kyrpang halor ka jingïashim bynta jong ki shipai Assam Rifles, kynthup ki shipai kynthei, ha ki kam pyntikna ïa ka shongsuk shongsaiñ jong ka United Nations kum ka United Nations Organization Stabilization Mission ha ka Democratic Republic of the Congo (MONUSCO), ha kaba ki la noh synñiang shi kat dei ha ka ban pyntikna ïa ka shongsuk shongsaiñ, ka jingshngaiñ, bad ka jingai jingïarap ïa ki briew.
La ban jur ruh halor ka jingkiew ka bynta jong ki kynthei ha ka Assam Rifles, kiba la pynrung nyngkong kum ki ‘Riflewomen’ ha u snem 2015.
Ki heh ophisar ki la kdew ruh ïa ka jingïashim bynta ba radbah jong ki ha ki kam ki jam, ki jingpahara ïa ka thaiñ khappud, ki kam wad jingtip, ki prokram treikam na ka bynta ki paidbah, bad ki kam ban pyntikna ïa ka shongsuk shongsaiñ ha ka pyrthei, kaba pyni ïa ka jingaiti jong ka kynhun shipai ban pynïasoh lang ïa ki shynrang bad kynthei bad ka jingtreikam kaba bha.
Ha ka jingïalang ïamir jingmut, u Brigadier Sandip Chatterjee, SM, u Brigadier Swarn Singh, VSM, bad kiwei-kiwei ki heh ophisar ki la ïakren bad ka kynhun ki nongthoh khubor – ki la jubab ïa ki jingkylli jong ki bad ïasam ïa ki jingshemphang halor ka jingpynkhreh kam, ki jingeh, bad ki sienjam jong ka kynhun shipai na ka bynta ki paidbah.
Shuh shuh ka kynhun ki nongthoh khubor ka la leit jngoh ïa ka Assam Rifles Museum, kaba la pyni ïa ka nam jong ka kynhun shipai lyngba ki tiar kiba don bynta bad ka histori, ki tiar ïaleh, ki uniform, bad ki jingthoh shaphang ka jingshlur.
Nalorkata, la ai jingtip lyngkot sha ka kynhun shaphang ki sienjam ba ïai bteng jong ka Assam Rifles ha ka ban ïakhun pyrshah ïa ka jingkhaïi-tuh bad ki kam be-aiñ kiba pyntreikam na kawei ka ri sha kawei pat, kynthup ïa ka jingkurup ïa ki mar ba la kheiñ be-aiñ kum ki dawai pynbuaid, ki tiar ïaleh, bad ki tiar siat, kaba kyntiew ïa ka jingïada ïa ka thaiñ khappud ha kane ka thaiñ.
Na ka liang ki nongthoh khubor ki la pynpaw ka jingsngewnguh ïa ka jingtbit bad ka jingaitilut jong ki shipai Assam Rifles, da kaba pdiang ïa ka jingnoh synñiang kaba khraw jong ka kynhun shipai sha ka jingshngaiñ jong ka ri bad ka bynta jong ka ha ka ban kyrshan ïa ki sienjam ban pynthikna ïa ka shongsuk shongsaiñ ha ka pyrthei.
