Shillong, Rymphang 04
U Myntri ka tnad Public Health Engineering (PHE), u Marcuise N. Marak, u la ïashim bynta ha ka jingïalang bad u Myntri ka tnad Jal Shakti, ban pynleit jingmut ha kaba ïadei bad ka jingtreikam bad ka jingpynbit-pynbiang ïa ka Jal Jeevan Mission (JJM).
Haba kren sha ki nongthoh khubor ha ka Sngi Balang, u Marcuise u la ong, “U Myntri ka tnad Jal Shakti u la khot ïa ki Myntri PHE jong ka ri baroh kawei ban don ka jingïakren halor ka jingtreikam bad ka jingpynbit-pynbiang ne ka jingmaramot jong ka JJM. Ngi la ïakren halor ki mat treikam, kumno ban ïaid shakhmat na ka bynta ka jingtreikam bad ka jingpynbit-pynbiang.”
U Marcuise u la pynpaw ba ka jingsiew ïa ki ‘Bill’ kiba sahteng ka dei ka jingeh kaba khraw kaba la pynpaw da ki Jylla.
“Man la ka Jylla ka la pynsngew shaphang ka jingsiew ïa ki ‘Bill’ ba dang sahteng. Ka Sorkar India ka la shimkhia ïa kane, bad u Myntri ka tnad Jal Shakti ruh u la ong ba un sa peit bniah ïa kane ka kam hapoh u bnai Rymphang,” u la bynrap.
