Shillong, Rymphang 04
Ki katto katne ngut ki nongseng kam lajong kiba ïoh ban ïashimbynta ha ka Reverse Buyer-Seller Meet (RBSM) 2026 kaba la long ha State Convention Centre, Shillong ki pynpaw ïa ka jingïoh jingmyntoi jong ki namar ka jinglah ka Sorkar ban pynlong ïa kaba kum kane ka prokram.
Ïa kane ka prokram la pynlong da ka tnad Commerce & Industries ka Sorkar Jylla ha ka jingïatreilang bad ka Federation of Indian Export Organisations (FIEO) hapoh ka Raising & Accelerating MSME Performance (RAMP) Scheme kaba la neh arsngi kynthih bad kaba la kut noh ha ka sngi Balang.
Ka Sorkar ka pynlong ïa kane ka prokram da ka jingthmu ban ïarap ban kyntiew ïa ki nongseng kam lajong ha ka Jylla, kata naduh nongseng kam kiba rit duh haduh kiba khamheh khnang ba ka pyrthei baroh kawei kan tip bad ïohi kumjuh ba ki mar ba mih na ka Jylla kin paw sha kiwei ki ri ka pyrthei.
La ïoh ban ïakren bad ka Kong Kynjai Marsing kaba dei ka nongsengkam bad kaba la lah ban pynheh ïa ka kam jong ka haduh ba ka lah ban ai kam ïa kiba bun ki khun samla lyngba jong ka Nongtluh Handloom Weaving and Multipurpose Corporative Society. Kane ka Society ka dei kaba pynmih shibun jait ki jingpynwandur ïa ki jaiñ na u ksai Ryndia, kum ki muffler, ki Shawl, ki Jaiñsem, ki pla, ki necktie bad shibun kiwei de.
Ka la pynpaw ïa ka jingsngew kmen bad ai khublei ïa ka Sorkar kaba la phai khmat sha ki nongsengkam lajong kaba la pynlong ïa ka Reverse Buyer-Seller Meet kaba la plie lad ban nang kham pynïar shuh-shuh ïa ka jingïadie ïathied ïa ki mar jong ki kaba la pynpaw ruh ba ka Society ka la ïoh ban ïasoi Memorandum of Understanding (MoU) bad ka Ri South Africa na ka bynta ban shalan pynïaid ïew ïa kine ki mar sha katei ka Ri.
Nalor kane la ïoh ruh ban ïakren bad ka Kong S Kynter kaba dei na ka shnong Kenmynsaw Synteiñ kaba hap ha Mawsynram Block kaba don ïa ka sap ban thaiñ ïa ki kriah, ki shang da ki thri bad ki siej, kaba la pynpaw ïa ka jingïoh jingmyntoi na kane ka jinglah ka Sorkar ban pynlong ïa kum kine ki prokram kaba la ïarap ïa ki ban pynheh ïa ka ïew ïadie ïathied haba ïadei ki mar ba ka pynmih.
U Bah Nombor Marngar u ba dei u nongri ngap na ka shnong Mawten, ba hap hapoh ka Mawkyrwat Block u la batai ïa ka rukom ri ngap bad pynpaw ba u ïoh jingmyntoi na kane ka prokram jong ka Sorkar.
