Shillong, Rymphang 04
Na kawei ka sngi sha kawei pat, ki kam tuh kam thiem ki la nang ïai bteng bad ïa kane lah ban sakhi na ka jingshah tuh jong ki arshaka, shah prong tuh jong ki ïing, bad ki jingshah tuh jong ki tiar na ki jaka bapher bapher kaba la jia ha kine ki sngi.
Katkum ka khubor kaba la ïoh na ki pulit la ong ba ha ka janmiet jong ka 2 tarik mynta u bnai, ki shipai BSF jong ka Patharghat BOP ha East Khasi Hills ki la bat ïa kawei ka arshaka, ïa kaba la suba ba la shu tuh kaba don ïa u registration number AS14-R-4522 na kawei ka jaka hajan ka Patharghat. La suba jur ba ïa kane ka arshaka la thmu ban shalan tuh sha Bangladesh.
Ha kawei pat ka khubor, ka la don ka jingujor sha ki pulit ba ha ka 31 tarik u bnai ba la lah, ha ka por kumba 8 baje mynstep, ki runar bym lah ban ithuh ki la tuh ïa ki ar tylli ki ‘water valves’ na Forest Pump House kaba don ha Polo, Shillong. Na ka liang jong u Ezekiel Sangma u la ai ka jingujor ba ha ka 1 tarik mynta u bnai, ki runar bym lah ban ithuh ki la tuh ïa ka laptop jong u, na ka ïingsah jong u kaba don ha Umpling Dongshaneng, Shillong.
Ha kawei pat ka khubor, ar ngut ki nongtrei jong ka ophis Central Water Commission kaba don ha Tharia, East Khasi Hills, ki la ailang ka jingujor ba ha ka 2 tarik mynta u bnai, ki runar bym lah ban ithuh ki la tuh ïa saw tylli ki shuki plastic bad kawei ka tari napoh ka ophis.
Na ka liang jong u Assistant Manager jong ka M/s DS Refill Station, Jrikhla Ionglwit Nongjngi ha West Jaiñtia Hills u la ai ka jingujor ba ha ka step jong ka 19 tarik jong u bnai ba la lah, ki runar bym lah ban ithuh ki la tuh ïa ka umphniang diesel na ka ‘main tank’ bad ruh ha kaba ki la ot ruh ki pipe umphniang.
