Shillong, Rymphang 04
U Myntri ba khmih ïa ka tnad PHE ka Sorkar Jylla u Marcuise N Marak u la pynpaw ka jingsngewhun haba hiar jurip bad lap ba ki kam ki ïaid beit ïaid ryntih haba ïadei bad ka jingpyntrei ïa ka projek New Shillong Water Supply Scheme.
Ha ka 3 tarik mynta u bnai, u Myntri u la hiar hi da lade ban bishar kam ïa ka jingpyntrei ïa ka New Shillong Water Supply Scheme Project ha kaba u la pynpaw ka jingsngewnguh ba ki kontraktor ki la shimkhia ïa ka kam bad ban ïaleh ban pyndep ïa ka projek ha ka por bala buh.
Haba kren sha ki lad pathai khubor u Myntri u la pyntip ba ki kam haba ïadei bad ka Civil Work kila dep ym duna ïa ka 30 percent bad kaba ka jingmang bad thied ïa ki tiar ki tar kum ki Pipe, ki Pump bad kiwei ki Mashin kala kot ym duna 90 percent. U Myntri u la ïathuh ba ki daw ba kane ka projek sam um sha ka thaiñ New Shillong Township (NST) ka slem ka dei namar ka jingeh ban ïoh jaka. “Ki ophisar ka tnad PHE kila shimkhia haba ïadei bad ka jingeh ban ïoh jaka bad ka shim por haduh shi snem ban ïoh jaka tang ban shna ïa ka Dam (Jaka Pyllang Um) na ka bynta kane ka projek,” u la ong.
U Myntri u la ïathuh ba ka projek sam um kan shakri ïa ki paidbah jong ka thaiñ New Shillong Township bad kumba 32 tylli ki shnong kiba don ha kane ka thaiñ.
U la ïathuh ba ïa ka um na bynta ka New Shillong Water Supply yn tan na Wah Umkhen namar ka dei ka wah kaba biang tam ban sam um sha baroh ki longïing jong ka New Shillong Township nalor 32 tylli ki shnong ba marjan. “Ka Project New Shillong Water Supply kan pynmih 15 Million liter man ka sngi ka um bad kane kala biang bha ban sam sha ki longïing bad ki shnong ba marjan hynrei ngi la buh biang ka thong ba kane ka projek ka dei ban pynmih 50 MLD ka um man ka sngi,” la ong u Myntri.
