Nongpoh, Rymphang 04
Ki nongshong shnong jong ka Lower Balian, Byrnihat ha Ri Bhoi District ha ka sngi Balang kila mih paidbah da ka jingbitar pyrshah ïa ka kompani Shyam Century Ferrous Limited halor ka jingkynnoh ba kane ka kompani kala shu treikam beaiñ khlem ki kot ki sla kiba biang katba ki paidbah ki hap mad jingeh na ka jaboh jabaiñ bad pum pum kiba mih na katei ka karkhana.
Ha kane ka sngi, la ïohi ïa ki nongshong shnong ba kynthup naduh ki khynnah kynthei samla bad shynrang, ki longkmie bad longkpa kumjuh ki la mih shakhmat ha ryngkat ki plakad jingkynthoh ban pynrem ïa katei ka karkhana kaba shu treikam beaiñ khlem ka jingïoh jingbit na ka shnong (No Objection Certificate) khamtam ha kaba ïadei bad ka jingpynlang ïa ki maw Clinker.
Ha kane ka sngi, na ka liang jong ki nongshong shnong kila dawa ruh na ki bor katei ka karkhana ba kin sei madan ïa ki jingïoh bit (NOC) na ka Sorkar ne ka shnong, ha kaba na ka liang ki bor ba dei khmih ka karkhana kim lah ban pyn-i ïa kita ki kot ki sla kumba la kynnoh.
Shuh shuh, ki nongshong shnong ki la kynnoh ba watla ha khyrdop katei ka karkhana la thoh ba ka dei kaba la khang khyrdep ha ktien phareng ‘Plant Closed’ hynrei ka dang pynlang pat ïa ki maw Clinker da ki spah tylli ki trok ha ka shi sngi ban pynïaid hapoh katei ka karkhana kaba la pynmih ïa ka lyer jaboh bad pum pum kaba la ktah bad buh jingeh shikatdei ïa ki paidbah nongshong shnong.
Na ka liang jong ki nongïalam shnong ba kynthup ïa u Bah Phrangsngi Pohtam Assistant Rangbah Shnong, u Suranjit D Sangma bad u Himanta Timung, dkhot jong ka shnong lem bad ki paidbah nongshong shnong ki la khang tala syndon ïa kane ka karkhana katba kam pat lah ban pynshai bad pynshisha ïa ki kot ki sla kiba donkam.
Kitei ki nongïalam shnong kila pynpaw ruh ba ki don bun kiwei ki karkhana kiba pyntreikam beaiñ khlem ki kot ki sla kiba biang bad na ka liang ka shnong kala buh lypa ka jingmaham ba ki dei ban khang khyrdep noh shisyndon lym kumta, ka shnong kam banse ban khang tala kumba la leh ïa kane ka karkhana.
Shuh shuh, na ka liang ki paidbah kila pynpaw ruh ïa ka jingpynrem jur ïa ka Meghalaya State Pollution Control Board (MSPCB) halor ka jingbym shimkhia jong ka ban leh eiei pyrshah ïa kiba kum kine ki karkhana kiba pynmih jaboh jabaiñ kumne bad dawa ruh na ka Sorkar ba ka dei ban shimkhia ban leh eiei bad tehlakam ïa kiba kum kine ki jait karkhana kiba buh jingma shikatdei ïa ka jingkoit jingkhiah jong ki paidbah bad byrthen ruh ba lada ki bor ba dei khmih kim leh eiei, na ka liang ki paidbah hi kim banse ban hap shim da kiwei pat ki lad ki lynti kiba tyngeh.
