Shillong, Rymphang 04
U Symbud Myntri Rangbah ka Jylla Bah Sniawbhalang Dhar uba peit ïa ka tnad ka kit ka bah u la kular ban nym pyndait ïa u Vehicle Location Tracking Device (VLTD) ïa ki kali kiba kamai hapoh ka Jylla, katba ïa ki kali kiba kamai shabar ka Jylla um pat ong eiei.
Kane ka jingkular u Bah Sniawbhalang ka dei ha ka jingïakynduh ka kynhun ki nongkamai taksi kiba hap hapoh ka shatri jong ka Meghalaya Joint Co-ordination Committee of Passengers Vehicle kaba la long ha ka sngi Balang.
Haba ïakren bad u Bah Paila K Lyngkot, President ka All Jaiñtia Commercial Vehicle Association u la ïathuh ba ka long kaba sngewtynnad haba ïakynduh ïa u Symbud Myntri Rangbah namar u la kular ban phah pyndam noh ïa ka hukum ba mynshwa bad mynta kim donkam shuh ban pyndait ïa une u tiar.
U la ïathuh ba ka dor jong une u tiar ka long 9500 tyngka bad hap siew sa ka bai pyndait ruh bad kane ka buh jingeh ïa ki trai kali.
U Bah Wandonbok Jyrwa u la ïathuh ba ïa une u “tracking device” la buh na ka bynta ka jinglong shngaiñ ïa ki nongleit nongwan khamtam haba leit sha jngai hynrei u la ong ba ka jingshngaiñ kiba kamai hapoh la ka jong ka Jylla ka la don lypa satang ïa kito kiba leit kamai shabar ka Jylla. U la ong ba ki kali kiba kamai hapoh ka Jylla ki la long shngaiñ lypa namar ki kamai tang hapoh Jylla.
U la pyntip ba u Bah Sniawbhalang u khlem kular pat la yn pyndait ne ym pyndait ïa ki kali ba leit kamai shabar ka Jylla.
