Shillong, Rymphang 04
U Working President ka National Peoples’ Party (NPP) u Marcuise N Marak uba long ruh u Myntri Sorkar u la pynbna ba ka seng ka dang pynkhreh ïa ka thup kyrteng jong ki kyrtong ban ïakhun ïa ka ilekshon MDC sha Garo Hills Autonomous District Council (GHADC), bad ïa kaba la khmih lynti ba ïa ka jingjied yn lah ban pyndep noh hapoh kane ka taïew.
“Ngi la don ha ka bynta kaba khatduh ban jied ïa ki kyrtong ki jong ngi. Shen ngin sa pynbna noh ïa ki kyrteng jong ki kyrtong jong ngi,” la ong u Marcuise bad bynrap ba ka NPP kan ïakhun ha baroh ki 29 tylli ki Konstitwensi.
Ka Meghalaya TMC ka lah ban nym pynïeng kyrtong ha ka ilekshon MDC jong ka Garo Hills Autonomous District Council (GHADC). Ïa kane la pyntip da u Marcuise N Marak bad u la kam ba u ïoh sngew khana ba ka TMC kala bthah ruh ïa ki MDC ba mynta ba kin ïakhun ha ka ilekshon MDC kum ki kyrtong shimet (Independent).
Haba kren sha ki lad pathai khubor u Marcuise u la kam ruh ba ïa mynta ka ilekshon MDC sha GHADC kan dei hapdeng ka NPP bad ka Congress.
U Marcuise u la ong ba watla um lah ban pynthikna ïa ka khubor ba ka TMC kam treh ban pynïeng kyrtong hynrei ki paidbah ha Rilum Garo ki la ïakhana ba ka TMC kam don bor shuh ban ïakhun ilekshon MDC ne MLA hapoh ka Jylla Meghalaya.
“Ngam pat lah ban pynthikna hynrei don kiba ïathuh ha nga ba ka TMC kam treh ban pynïeng kyrtong ban ïakhun ilekshon MDC sha GHADC. Don ruh kiba ïathuh ïa nga ba ka TMC kala bthah ïa la ki MDC ba mynta ba kin ïakhun noh kum ki kyrtong shimet ha kane ka ilekshon MDC ban wan,” la ong u Marcuise.
U la ong ba kum ki nongmihkhmat paidbah kim lah ban shim sting ïa kano-kano ka seng saiñ pyrthei bad u la bynrap da ka ba ong, “Ngam kheiñ ba ka TMC ka dei ka lieng ba la ngam namar ki dang don MLA. Ngin ap haduh da wan ka por ba biang ban thikna, ka TMC kan pynïeng kyrtong ne em ha ka ilekshon MDC sha GHADC”.
