Shillong, Rymphang 04
Kum shi bynta jong ka ‘Press Tour’ sha Meghalaya ba la pynlong da ka Press Information Bureau (PIB), Sorkar India, ka kynhun ki nongthoh khubor na Karnataka mynta ka sngi ka la leit jngoh ïa ka Umden Diwon ‘Silk Village’ kaba don ha Ri-Bhoi, kaba la tip bha na ka bynta ka dustur ba riewspah jong ka jingthaiñ ryndia bad ka jingthaiñ jaiñ ba la shong nongrim ha ka imlang-sahlang.
Ka shnong ka long kaba pawnam ha ka ban pynmih ïa ka ‘Eri Silk’, kaba la tip ha ka thaiñ kum ka Ryndia, kaba dang shen ka la ïoh ïa ka dak ba kongsan jong ka Geographical Indication (GI), kaba ithuh ïa ka jinglong kyrpang jong ka ha ka kam thaiñ jaiñ bad ka jinghiar pateng ka deiriti.
Ka ‘Eri Silk’ ka dei ka ryndia ‘Ahimsa’, kaba la lum khlem da buh jingma ïa ki khñiang ryndia, kaba pynlong ïa ka kum ka jaiñ kaba lah ban pynneh-pynsah ïa ka mariang bad kaba la pynmih da ka jingbahkhlieh.
Ha kane ka jingleit jngoh, ka kynhun ki nongthoh khubor ka la ïakren bad ki nongtrei kti na ka thaiñ, khamtam eh ki kynthei nongthaiñ jaiñ, bad ki la ïoh jingtip shaphang ka rukom pynmih jaiñ ryndia naduh ka jingri bad jingpynkhreh ïa ki khñiang ryndia haduh ka jingai rong bad ka jingthaiñ jaiñ da ka kti.
Ki nongtrei kti ki la pyni ïa ka jingpyndonkam ïa ki rong ba la shna na ki jingthung ba don ha ka thaiñ bad ki mar ‘organic’, kiba ai ïa ka ‘Eri Silk’ ka rong ba kyrpang jong ka katba ki pyntikna ïa ka jingpynmih kaba lait na ki dawai bad kaba ïadei bad ka mariang.
Na ka liang ki nongthoh khubor ki la ïakren bad ki dkhot jong ki Self Help Group (SHG) ba ïalam da ki longkmie, kiba la ïasam ïa ki jingshem jong ki ban pynneh-pynsah ïa ki rukom thaiñ jaiñ tynrai, ban kyntiew ïa ka jingpynmih, bad wanrah ïa ki lad kamai kiba lah ban ïaineh lyngba ka jingtreilang.
Ka kynhun ka la peit ruh ïa ki rukom shna jaiñ kiba ïar bad ka jinglong tynrai jong ki mar ‘Eri Silk’ kum ki jaiñ tawah ne ki ‘Shawl’ bad ki ‘Stole’, da kaba ïaroh ïa ka jingpynïasoh ïa ka riti-dustur bad ka jingtbit kaba long ka dak jong ka jingtbit jong ka Umden Diwon.
Ki jingïakren ki long shaphang ka jinglah ban ïoh ïa ki ïew ki hat, ka jingpynïaid ïew ïa ki mar ba don ‘GI Tag’, bad ka bynta jong ki lad pathai khubor ha ka ban kyntiew ïa ki kam shna jingshna tynrai ha ka ri.
Ka jingleit jngoh ka la nang kham don jingmut ha ka jingïadei bad ka jingkren jong u Myntri Rangbahduh ka ri, u Narendra Modi shaphang ka ‘Eri Silk’ jong ka Meghalaya ha ka bynta kaba 123 jong ka ‘Mann Ki Baat’, ha kaba u la ïaroh ïa ki jingsaiñdur ba ïar jong ka India, ki kam shna jingshna, bad ki sap tynrai.
U Myntri Rangbahduh u la ïaroh ruh ïa ki longkmie jong ka Jylla Meghalaya kiba la lamkhmat ïa ka jingpynmih ‘Eri Silk’ lyngba ki Self Help Group, da kaba batai ïa ka kum ka nuksa jong ka jingïaineh, ka jingpynneh-pynsah ïa ka kolshor, bad ka jingpynmih ïa ki lad kamai-kajih.
Ki dkhot jong ka kynhun ki nongthoh khubor na Karnataka ki la ïaroh ïa ka jingïaineh bad ka jingaitilut jong ki nongtrei kti bad ki la ai khublei ïa ka bor shnong jong ka Umden Diwon ‘Silk Village’ ban noh synñiang ha ka ban kyntiew ïa ki mar tynrai ba la buh dak GI, ka jingseng kam seng jam ha ki jaka nongkyndong, bad ka kam jngohkai pyrthei kaba ïaineh ha ka thaiñ.
