New Delhi, Rymphang:
Ka Myntri Rangbah jong ka jylla West Bengal, ka Mamata Banerjee, ka la poi ha Supreme Court, ha shwa ka jingbishar kaba kongsan halor ki dorkhas kiba tuklar ïa ka Election Commission kaba dang ïaid shakhmat jong ka Special Intensive Revision (SIR) jong ka Election Commission ïa ki thup kyrteng thep vote ha ka jylla.
Ka Myntri Rangbah ka la ai ruh ïa ka aplikeshon ba shipor ban pan jingbit ban wan mih bad ban ïasaid hi dalade. Ka Banerjee ka don hi dalade ha ka kamra bishar kaba nyngkong, ryngkat bad ki nongïasaid aiñ jong ka. La ai ïa ka Gate Pass ha ka kyrteng jong ka Myntri Rangbah ha ka sngi Ba-ar.
Katkum ka Website jong ka ïingbishar ba hakhliehduh, la buh por ba ka kynhun jong ki nongbishar kaba kynthup ïa u Chief Justice Surya Kant bad u Justice Joymalya Bagchi bad u Justice Vipul M. Pancholi, la buh por ban bishar ïa ki dorkhas ba la mudui da ka Banerjee bad lai ngut kiwei pat, kiba kynthup ïa u Mostari Banu bad ki MP jong ka seng TMC, u Derek O’Brien bad u Dola Sen.
