Shillong, Rymphang 04
U Babu Kular Khongjirem uba long u nong-ïalam barim ka Khasi-Jaiñtia Deficit School Teachers Association u la kynnoh ba ka Sorkar Jylla lyngba ka Megha-laya Board Of School Education (MBOSE) ka don ka jingleh shiliang khmat ha ka rukom buh ïa ki Vocational Subject kaba ki khynnah ki dei ban jied lada kim shim ïa ka Subject Health & Physical Education bad ïa ka Computer Science.
Haba kren sha ki nongthoh khubor ha ka sngi Balang, u Babu Kular u la ïathuh ba ki khynnah kiba shim ïa ka Health & Physical Education bad Computer Science ki hap ban thoh eksam 80 mark bad 20 mark ka dei ka ‘internal mark’, katba ki khynnah ki bym shim ïa kine ki sobjek, kiba shim pat da ka Vocational Subject ki thoh eksam tang 30 mark namar 20 mark ki ïoh na ka ‘internal’ bad 50 mark ka ‘Practical’.
Kumta u Babu Khong -jirem u la ong ba kane ka dei ka bym lah ban pdiang namar kam long ïa ryntih ïa baroh bad kynnoh ba ka don ka jingnoh shiliang namar ki khynnah ba shim ïa ki ‘Vocational Subject’ ki ïoh nong shibun ha ka rukom ïoh mark katba kiba shim ïa ka sobjek Health bad Computer ki duhnong shibun. U la ai jingmut ïa ka Sorkar ba ka dei ban pynïaryngkat ïa kane ka rukom ai mark ïa ki khynnah ba shim ïa ka Health & Physical Education bad Computer Science, da kaba dei ban ai practical lang 50 mark lane ban phah thoh lang 80 mark ïa kiba shim Vocational Subject khnang ba kan long ïaryngkat ïa baroh.
Shuh-shuh u la ong ba ha ki skul shimet ïa ki Vocational Subject ka Sorkar ka khlem buh hynrei ka buh tang ha ki skul Sorkar bad skul Adhoc namar ïa ki nonghikai ruh la siew tulop da ka Sorkar, katba ha ki skul shimet kim lah ban buh ïa kine ki sobjek namar ki bor pynïaid skul kim lah ban pynbiang ïa ki jingdonkam, kumta u la kyrpad ïa ka Sorkar ba ka dei ban buh Vocational Subject ha baroh la ki dei skul shimet ne skul Sorkar ruh khnang ba ka long kaba ïaryntih lang ïa baroh.
