Shillong, Rymphang 04
U Bah Prestone Tynsong uba dei u Symbud Myntri Rangbah ka Jylla ba khmih ïa ka tnad PWD (Roads & Buildings) u la hiar sha Delhi ban ïakynduh ïa ki heh ki haiñ ban tynruh ïa ki kam pynroi bad ki projek jingtei ba kongsan ban kyntiew ïa ka roi ka par ka Meghalaya.
Ha kane ka jingleit Delhi, u Bah Prestone u la ïakynduh ïa u Managing Director ka National Highways and Infrastructure Development Corporation Limited (NHIDCL), haba pynleit jingmut ïa ki projek surok kiba kongsan, kynthup ïa jingpynpoi ïa ka flyover sha Barik Point bad ka jingshna ïa ka High Speed Corridor na Umiam sha Malidor, nalor ban pynbha ïa ka surok Shillong-Dawki bad Phulbari-Agia.
“Ka jingpyndep ïa kine ki projek surok kiba heh kan ai shibun ki jingmyntoi ïa ki paidbah ka Jylla Meghalaya,” u la ong.
U Bah Prestone u la ïakynduh ruh ïa u Director General of Defence ban ïakren ïa ka jingaiti ïa ka jaka shipai kiba don ha kylleng ka nongbah Shillong sha ka Sorkar Jylla, haba kdew ïa ka jinglong kongsan kine ki jaka na ka bynta ki kam pynroi hangne ha Sor.
“Shisien ba la aiti ïa ki jaka shipai, ngin sa lah ban pyntreikam ïa ki projek kiba kongsan ki ban ai shibun ki jingmyntoi ïa ki paidbah jong ngi bad ka Jylla,” ong u Bah Prestone.
Nalor kane, u Bah Prestone u la ïakren ruh bad u Director General ka Ministry of Road Transport and Highway na ka bynta ban tei noh da ki jingkieng dewbilat ïa ki jingkieng dieng ba shipor kiba don ha Jylla nalor ban pynheh ïa ki surok ba kongsan kum ka Shillong-Nongstoiñ-Tura bad Phulbari-Rajabala-Mahendragank sha Mancachar.
