Shillong, Rymphang 04
Ki pulit ka Anti Narcotics Task Force (ANTF) ka Jylla ha ka sngi Balang ki la ïoh ban kurup noh ïa u drok bad bat noh ïa ki ar ngut na kawei ka kali ha ka thaiñ Mawiong.
Katkum ka khubor kaba la ïoh la ong ba ha kane ka sngi, ki pulit ki la ïoh ïa ka jingtip kaba bniah ba ka don kawei ka kali kaba dang wan phai na Guwahati bad kiew sha Shillong ha kaba la suba ba ka la kit ïa u drok. Mar kumta ki pulit ki la pynlong ïa ka jingpynap shrip ha ka thaiñ Mawiong bad ïoh ban bat noh ïa kane ka kali.
Hadien ba la ïoh bat bad haba pynlong ka jingtalasi ïa kane ka kali kaba don ïa u registration number ML05-M-6379, ki pulit ki la lap ïa ki thyrnia injek drok bad 11 tylli ki vial kiba la thep drok ïa uba la suba u ‘heroin’ uba don ka jingkhia kaba 1.3 gram.
La ong ba ha kane ka kali ki la don tang ar ngut kiba shong kata ka kynthei kaba kyrteng ka Bandarihun Kharbani bad u shynrang uba ñiah ïa ka kali u dei uba kyrteng u Dawan Salanmi Marbaniang.
Ïa kine ki arngut la register case ha thanad Mawlai hapoh ki kyndon ka NDPS bad ka jingtohkit mynta kala ïaid shakhmat.
