Jowai, Rymphang 04
Ka Ïingkashari Session Judge, Jowai u N.A. Khan ka la rai pynrem ïa u Stam Surong ha kaba ïadei bad ka Sessions Case No. 37 jong u snem 2015 da kaba set phatok shi jingim namar ka jingdonkti ha kaba ïadei bad ka jingpynïap dusmon ïa la ka jong ka kurim da kaba thang da ka ding.
Kane ka case ka dei kaba mih na ka jingmudui ejahar da u Bah Barwill Singh Sari hakhmat u In-charge ka Ummulong Beat House ha kaba la pyntip ba ha ka 08 tarik Nailur, 2006 ha ka por kumba 5 baje mynstep, une u briew ba la shah kynnoh donkti, u Stam Surong uba dei na ka shnong Mukhla Nongrim u la thang im ïa la ka jong ka kurim ka Kong Before Sari da kaba pyndonkam da ka umphniang sharak hapoh ka ïingsah jong ki.
Hashwa ba kan khlad noh namar ka jingmynsaw jur, kane ka lanot ka la phla ïa kane ka jingjia baroh sha la ki jong kiba haïing hasem jong ka. Hadien la rejistar case hapoh ka thanad Jowai bad la tohkit bad Charge-sheet da u SI. A. Rymbai.
Hadien ka jingtian bishar, ka ïingkashari ka la lap ïa ka jingdonkti jong une u briew halor kane ka kam bymman kaba lah ban shah pynshitom hapoh ka kyndon 302 jong ka Indian Penal Code.
Kumta ka ïingkashari ka la rai pynrem ïa u Stam Surong da kaba set phatok shi jingim ha ryngkat ka kuna kaba T.5000.
