Shillong, Rymphang 04
U Myntri ba khmih ïa ka tnad ka Koit ka Khiah Bah Wailadmiki Shylla u la ong ba ka jingkiew ha ka jingdon ki nongpang bampong (cancer) ha Jylla ka dei namar ki briew ki pyndonkam ïa u duma bad ka jingdih pynbuaid.
Kane ka jingpynpaw u Bah Wailad ka dei haba u ai jingkren ha ka 2nd Meghalaya Cancer Conclave ba arsngi, ba la pynlong da ka State Cancer Society of Meghalaya ha ka sngi Balang ha Vivanta, Shillong, kaba la wan ïashimbynta da ki doktor na kylleng ka Jylla bad ki ophisar ka tnad ka Koit ka Khiah.
Haba ai jingkren, u Myntri u la ong ba man ki briew ba shah ktah ha ka jingpang bampong ki don ïa la ki jong ki khana kiba pher, bad ai ba kane ka conclave kan long kum ka jingpynkynmaw ïa ki jingeh bapher-bapher ba la mad da ki nongpang. U la ban jur ba ka imlang sahlang kam dei ban ïaid lait na ka jingïaleh pyrshah ïa ka jingpang bampong.
U la ïathuh ba ha India ki don kumba 1.56 million ngut ki nongpang bampong ba dang ïoh thymmai manla u snem bad ka Meghalaya ka dang ïai long kawei na ki Jylla ba don bun bha ki nongpang bad ka East Khasi Hills kaba la shah ktah bha.
U la ong ba ka jingdon bun ki nongpang bampong ha Jylla ka daw ka dei namar ki duna ka jingpynshai paidbah, ka jingsngap jar, ka jingbym lah ban leit leh test ha ka por ba biang, kila nang pynsniew shuh shuh.
U Bah Wailad u la kyntu ïa ki nongshong shnong ba kin leit leh medical check-up katba ki dang shait dang khlaiñ ha ka jaka ban ap haduh ban da jur ka jingpang.
Ha kane ka sngi u Principal Secretary ka tnad ka Koit ka Khiah u Sampath Kumar u la pyntip ba ka East Khasi Hills District ka dang ïai long kawei na ki district ba bun eh ki nongpang bampong ha Meghalaya ha kaba haduh 227.9 tylli ki case la lap ha man ka shi lak ngut ki nongshong shnong.
Kumjuh ruh u Bah Wailadmiki u la pyllait ïa ki prokram ba kongsan kiba thmu ban pynkhlaiñ ïa ki lad jingïada bad jingtem ïa ka jingpang bampong ha ka Jylla, kine ki kynthup ïa ka jingpyntreikam ïa ka Meghalaya Mission for Cancer Prevention and Early Detention, ka Cancer Screening App bad Screening Devices bad ka jingleh ïa ka HPC testing ha ka Jylla baroh kawei.
U la plie ruh ïa ka projek ba ïatreilang hapdeng ka Sorkar Meghalaya bad ka Grace Cancer Foundation, Hyderabad, Telangana, kaba pynleit jingmut halor ka jingtem ïa ka jingpang bampong ha West Khasi Hills District.
