Shillong, Rymphang 05
Hynriew bnai mynshwa, ka Synjuk Ki Khatphra Sirdar Shnong kiba hap ha Mawkynrew Constituency, ka la buh jingthoh sha u Bah Banteidor Lyngdoh, MLA ryngkat ka jingkyrpad ba un pynïoh ïa ka kali kit nongpang (Ambulance) ka ban kit ban bah ha ka pang ka shitom bad ha ki jingjia ba sngewsih ki nongshong shnong.
Kumta u Bah Banteidor u la shimkhia ïa katei ka jingkyrpad bad kane ka jingangnud ki khatphra shnong ka la urlong ha ka 04 tarik u Rymphang, 2026 ha kaba u la wan aiti da ka Ambulance kaba shongdor haduh 14 lak 47 hajar tyngka kaba la biang nadong shadong kaba dei da ka kali Mahindra Bolero Neo.
Ïa kane ka Ambulance la aiti sha ka Jatah PHC ka ban pyntyllun pat ïa kane kali na ka bynta ka jingmyntoi ki nongshong shnong kata haba don ki kam ne ki jingïakynduh kiba kyrkieh kiba donkam ban kit ïa kiba pang ba shitom sha ki jaka sumar kum ki CHC ba don marjan ne wat sha ki jaka sumar kiba kham paka ha nongbah Shillong.
Haba kren ha ka jingïalang aiti ïa ka Ambulance, u Bah Banteidor u la ong, “Baroh shi katta ka don ka Ambulance ha kane ka PHC hynrei la pyntip ba ka la kham rim bad kumta ka la donkam da kaba thymmai. Mar ïa ïoh ïa ka jingthoh na ka ka Synjuk Ki Sirdar Khatphra Shnong, nga la shim ba ka dei ka jingdonkam kaba ïadei bad ka ïap ka im ki nongshong shnong”.
Da kaba pyntip ba u la pynmang pisa ban pynïoh ïa kane ka Ambulance lyngba ka Special Rural Work Programme (SRWP) 2025-2026, u MLA u la bynrap ba ka dei kaba u la pyrkhat ba kan long ka jingmyntoi bad ka jingïarap ïa ki nongshong shnong kumta u la pynkhreh ïa katei ka mang tyngka watla ka la kham heh haba kheiñ na katei ka skhim.
Ha kane ka sngi, nalor u Bah Banteidor, la ïadonlang da ki nongïalam ka Synjuk kiba la ai jingkren khublei ïa u MLA uba la shimkhia ïa kane ka kam, ki Doctor na ka PHC, ki ophisar, ki nongtrei ka PHC, ki nongshong shnong lem ki riew rangbah bad longkmie na ka thaiñ.
