Shillong, Rymphang 05
U Dr. Ricky AJ Syngkon, MP Lok Sabha na Shillong Parliamentary Constituency u la ong ba ka dei ka jingleh bym suitñiew hi ka Sorkar India bad ka Sorkar Jylla ba jia ka jingïap briew na ka jingbthei dynamite ha krem dewïong ha Thangsko, East Jaiñtia Hills District.
Kane ka jingjia bthei u dynamite ha krem dewïong ha Thangsko ka la jia ha ka step jong ka 05 tarik u Rymphang 2026, kaba la shim ïa ka jingim haduh 18 ngut ki nongtih dewïong bad bun ngut pat ki la mynsaw.
Haba kren sha ki lad pathai khubor ha ka nohphai sngi jong ka 5 tarik u Rymphang, 2026, u Dr. Ricky, u la ong ba la bunsien u la pynsngew ha Ïingdorbar Thawaiñ Lok Sabha halor ka jingïaibteng ka kam tih dewïong hynrei ka don pynban ka jingleh bym suitñiew.
Nalor kata, u la ong ba ka jingkynnoh kan leit sha ki Sorkar khamtam ïa ka Sorkar Jylla kaba ailad ïa ka kam tih dewïong be-aiñ ban bteng ha kane ka Jylla.
Halor kane ka jingjia u Dr.Ricky u la pynpaw ïa ka jingsngewsih kaba khraw namar ka jingduhnoh ïa ki mynsiem briew na kane ka jingbthei ha katei ka krem dewïong.
“Ngin nym sngew phylla shuh halor kine ki jingjia, namar kum kine ki jingjia ki ju ïai jia na ka por sha ka por, namar ïoh lehse ym don kiba pyntip hynrei kum kine ki ju jia,” u la ong.
Kumta u Dr.Ricky u la dawa ba u Myntri Sorkar Pdeng ba dei khmih ïa kane ka kam hapoh ka Jylla Meghalaya u dei ban hiar shuki noh namar baroh ki jingjia dei ka jingtip jong u.
Nalorkata, u la kyntu ruh ban thung ka kynja jingtohkit halor kane ka jingjia bad dei ban kem mardor ïa ki trai jong ki par dewïong bad kumjuh ruh ïa kito kiba tip ba ka don ka jingtih dewïong beaiñ hynrei kiba shu leh matlah.
